變成女鬼既我，剩返30日要出POOL！: （十九）原來

「你⋯⋯點解會係到？」我問。
 
「呢句我問返你先啱。」
 
「我都唔知⋯⋯」
 
「揾唔到心願，定父母方面有咩問題？」阿炫緊盯著我，彷彿看穿我內心。
 
「以前日日見阿爸阿媽，諗住一定好了解佢地，原來我對佢地認知得一面，佢地既世界⋯⋯好似太複雜。」
 




「我地先係十八歲，又點會知父母諗咩？」
 
「十八歲⋯⋯我就係永遠停係十八歲！」我望去旁邊戲院Toy Story 5 Poster，翠絲企係胡迪同巴斯光年中間。
 
「我既人生就停左係到！就連嚟緊上映既Toy Story 5我都睇唔到！」我大喊。
 
「明明講好左，話下年去東京，會一齊再去富士山！上次我都睇唔清楚富士山咩樣，比啲霧遮住晒！」
 
「阿爸隻香水好難聞，屋企成條走廊都係佢陣味！依家先知佢用香水遮煙味！阿公就係食煙引致肺癌而病逝，我唔明佢以前戒左煙，佢明知仲要去食返！」
 




「屋企有Maria煮飯都夠啦！阿媽死都要放工返嚟煮飯，又唔係煮得好食！佢啲蕃茄炒蛋好鹹！」
 
我將心入面既野毫無保留咁講晒出嚟，場面一度沉默。
 
「你比啲反應啦！作為朋友，你要安慰我㗎嘛！」我拉住阿炫衣袖。
 
「咁你係咪要上我身，同你父母講以上說話？」阿炫突然靠近我，雙手搭在我雙肩上。
 
阿炫一臉真摯望住我，我視線卻落在佢既嘴唇上，紅通通而光滑無比。
 




我立即移開視線，退後一步講：「你諗左去邊呀？」
 
佢呆愣數秒講：「我唔識你父母，仲有零用錢唔夠請佢地去東京。Toy Story如果想睇先，要識內部職員。」
 
「邊個叫你請佢地東京？仲有你識Toy Story內部職員咩！你學生邊有咁多錢！」我忍唔住拍打佢肩膞。
 
「咁你想我點？」
 
「我唔係咁既意思呀！我純粹⋯⋯純粹就係想有人聽下自己講野。」
 
「淨係咁樣？」
 
「你呀，你個人咁木獨！」我輕輕用拳頭敲打佢既胸口講：「將來女朋友同你講，佢今日唔開心，你第一時間唔好比建議，而係先安慰，提供情緒價值。」
 
阿炫一臉疑惑望住我，我只好繼續解釋：「大部分女仔都係感性為主，以我為例，會想第一句聽到『你依家好返啲未？』，再唔係講『你頭先一定好難受。』如果你將來入到U，識到女朋友，你仲可以話：『你慢慢講，我會一直係你隔離聽你講。』」




 
「咁我依家一直都係你隔離聽你講，唔係咩？」阿炫微笑。
 
阿炫笑起上嚟，原來會係彎月眼，點解平時就係咁Cool！
 
「你唔好周圍同女仔講呢啲說話呀！仲有呀，你唔好對住個個女仔都笑，人地會誤會㗎！」
 
「我頭先冇笑。」
 
「你有！」
 
「冇。」
 
「有！」
 




「冇。」
 
「有呀！」
 
「冇。」
 
「你將來試下對女朋友用強硬既態度，保證你一個月比女飛！女仔話有就有，就算冇，你都要話有！」
 
「我真係冇，係事實。」
 
「我真係冇氣再同你呢舊石辯論！」
 
「我返屋企先。」阿炫轉身。
 
「咪行咁快啦！」阿炫一步等於我兩步。




 
「你唔係可以瞬間移動咩？」
 
「一齊行冇咁無聊呀嘛！點解你會出現係到既？」
 
「Starbucks温書效率高過屋企。」
 
眼前突然有個公仔樣既男生飄過，手上戴住紅繩，感覺佢有啲熟口面。
 
「我叫梁建昊呀！下次有機會再見！」
 
仔細一睇梁建昊，五官眉清目秀，好似公仔，如果打扮下絕對係靚仔，女仔會鍾意既類型。
 
「佢咪上次打架個男仔？」我目不轉睛。
 




「人地既事唔好理。」阿炫繼續向前行。
 
「但係佢同我一樣⋯⋯」
 
「你咁多時間，諗下有咩心願仲好。」
 
「楊燦炫，你真係冇得救！」我踢向阿炫腳腂，但佢好似有預知能力，提前避開我既攻擊。
 
「黑人憎！」我踢向路邊石頭，石頭紋風不動，兩舊石都蝦我！
 
「喂！」我伸手拍向阿炫肩膞，卻發現旁邊只有空氣。
 
我回頭一望，只見阿炫閉上雙眼。
 
「阿炫，你唔舒服呀？」
 
「澄，我感覺到個男仔有惡鬼既氣息。」
 
「係魔靈？」
 
「我淨係感應到，唔只一隻惡鬼。」
 
「咁我地係咪要跟實梁建昊？我同你一齊去呀！」
 
「你返屋企，呢件事我一個人跟。」
 
「你一個人點搞？上次都已經好炆水！我驚你會有危險呀！不如依家叫阿傲過嚟幫手？」
 
「阿傲？叫得佢嚟，我都搞掂。」
 
「我返去同Uncle同Auntie講！我唔會比你有事！」話畢，我立即瞬間轉移。
 
楊爸坐係到飲茶，楊媽就煮緊飯。
 
「Auntie，阿炫感應到有惡鬼，仲要唔只一隻！」
 
楊媽停下炒菜，講：「阿炫可以處理，我留飯比佢。」
 
「你同Uncle唔去幫手？」
 
「惡鬼係要由佢自己解決。」楊爸突然係我身後。
 
「但係我上次見過惡鬼，好似魔靈咁樣，真係好恐怖！我驚佢再撞到惡靈！」
 
「如果佢搞唔掂魔靈，代表佢面對唔到心魔，咁佢係無辦法成為出色驅魔師，更加唔可以代表楊氏一族。」楊爸緊皺眉頭，撓住手講。
 
萬一阿炫贏左，但受傷呢？萬一⋯⋯我搖搖頭，唔夠膽再想像落去。
 
原來阿炫係咁樣既家庭長大，難怪佢有咩事都唔會同家人講，只會默默諗解決方法。
 
我話佢係木獨，係石頭，仲話佢一個月內會比女飛⋯⋯我一直只係了解表層既佢。
 
我再次瞬間轉移。
 
「阿炫！」我瞬間嚟到阿炫面前，啱啱好係聖約翰中學校門前。
 
「你嚟做咩？」阿炫係口袋中取出一道符咒。
 
「我嚟係梗係幫你啦！多個人咪多個辦法，點都好過你孤軍作戰呀！」
 
「你依家唔走，我就用手上既符咒趕你走。」
 
「喂！楊燦炫，我都係幫你啫，洗唔洗咁既態度呀！」
 
「⋯⋯」
 
「點解你要咁諗我？我真係驚⋯⋯萬一你受傷，咁點算呀？就算你扔個符咒，我都係唔會走㗎啦！我想幫你咋！」
 
「劉淽澄，你真係幫到我咩？」
 
「你咩意思？」
 
「有邊次唔係我幫手執你啲手尾？」
 
「既然你咁憎我，點解一開始要幫我？你本身都唔幫人㗎啦！」
 
「當時既你睇落好可憐。」阿炫用冷冰冰臉孔講。
 
「好！天下無敵既楊燦炫，我話知你係生定死！你個符咒可以慳返！」我立即踢阿炫腳腂，然後瞬間轉移。
 
如果當時既我發現阿炫口不對心，堅持留低同佢打魔靈，或者阿炫就唔會出事？
 
我望住昏迷不醒既阿炫，下定決心講：「今次到我救你。」