變成女鬼既我，剩返30日要出POOL！: （二十）決戰【楊燦炫視角】
我摸住腳腂，但胸口更讓我透不過氣，也許良心作祟，源於向阿澄講大話。
如果我唔係咁講，阿澄肯定會同我一齊打魔靈。
頭先阿澄問我既時候，我除左感應到多個惡鬼，其實我仲感應到魔靈氣息。
魔靈係非常危險既惡鬼，小葵都係比佢害死！
上次只係因為阿澄上左我身，先會同佢一齊打魔靈。
我除下眼罩，再次感應鬼魂位置。
魔靈，你比左魔力比我，今日我就用返魔力嚟收拾你。
我攀過校門，經過操場，聽到體育倉庫似乎有人聲。
今日係星期日，依家係夜晚，冇人係正常。
我潛步到倉庫，從窗戶偷窺倉庫情況，共有4個男學生。
「屌你老母臭閪！得個500蚊，貢丸哥洗兩洗都洗完啦！」長髮男講。
「我真係⋯⋯真係得咁多錢咋！」矮男講。
「平時你有上補習班，我就唔信你冇錢！」貢丸將手上既籃球，用力撞落矮男肚上。
「呀！」矮男生大喊後，跌坐在地上，不能站立。
亂毛男同長髮男趁機搜矮男一身，從褲袋中搜出1000蚊。
「矮仔！仲話冇錢！」話畢，矮男被三人群毆。
我既目標係要揾出魔靈，佢地就繼續打鬧，反正唔會影響我既計劃。
「喂！楊燦炫，你係咪咁冷血呀！」一把熟悉既聲音突然從腦海中出現。
如果阿澄係到，我諗佢一定二話不說，即刻衝上去幫矮男。
驅魔師第一點係冷靜，無論身邊發生咩事，都要專注任務，衝動只會引起魔靈注意。
當我想離開既時候，感應到門外有2隻惡鬼，帶頭既鬼係普通鬼，正正係梁建昊，手上既紅繩幾乎全紅，只有丁點黑色，預計啱啱死左冇耐。
「我負責打最高大既肥佬貢丸，剩低兩個比我打一拳，之後你地搞掂佢地。」梁建昊狠盯貢丸、長髮同亂毛男。
雖然惡鬼係禍害人間，見到理應立即消滅，但佢地行動意味消耗體力，未嘗對我嚟講唔係好事，況且三人幫⋯⋯係要有人治下佢地。
只係有兩個問題我諗唔通：
第一：梁建昊咁短時間之內，點解會識兩個惡鬼？
第二：魔靈到底係邊？
梁建昊及惡鬼穿過倉門。
「呀！我啲頭髮！」長毛頭髮被梁建昊扯住，然後佢再將長毛扔到亂毛身上，因此長毛壓在亂毛身上。
「撞鬼呀！」矮男目睹一切，立即拔腿跑走。
「喂，長毛、亂毛！你地做乜撚野！」貢丸上前時，被梁建昊一拳打落臉上。
長毛同亂毛分別被兩名惡鬼毆打，奇怪係惡鬼冇傷及二人重要部位，並唔係惡鬼一般作風。
「你個貢丸！生前成日點我買炒麵麵包，成日搶我錢，嬲個陣仲當我係出氣袋，我都可以忍！」梁建昊不斷攻擊貢丸身上不同部位。
「但係你點都唔可以……唔可以搶我夢想！」
「你明知乒乓球就係我既全部，然而我隻手傷到玩唔到乒乓波，十幾年心血冇晒！！！！」
貢丸被梁建昊打到嘔血。
「你隻鬼……比我揾到你，你死梗……我跆拳道……」
「黑帶呀嘛！」梁建昊打甩貢丸一隻牙。
其餘二人都被惡鬼打暈。
倉庫大門打開，我瞄準二隻鬼既頭部，雙手同時拋出符咒。
惡鬼如黑霧般消失，只剩下梁建昊一人。
梁建昊回頭後，我同佢對視數秒。
「恩人？你真正身份係驅魔師？」
「魔靈依家係邊？」
「魔靈大人講既人原來係你。」
「你應該知道，魔靈唔係咩好鬼，你幫佢，你實有代價。」
「𡃁仔，你咁講～就錯啦～」魔靈突然從門口出現。
「你終於出嚟。」我準備定符咒扔向佢。
「你認為就憑呢啲符咒，就可以傷到我？」
我把符咒扔向魔靈，魔靈仍然屹立不搖。
「𡃁仔，琴日迪士尼先見完，點解招數都係一樣㗎～琴日個𡃁妹呢？」
「廢話少講，我今日嚟，係要同你決一死戰。」
「係呀？昊仔，過嚟幫我～」
「魔靈！」
「驅魔師不得殺普通鬼，否則要受陰間使者審判，嚴重者甚至失去法力，我冇講錯呀嘛？」魔靈笑意盈盈望住我。
我瞪大雙眼，從背部取出木劍，汗珠滑過臉龐。
今次中計。
「你知我實會感應到你既氣息，故意叫梁建昊係我屋企附近商場出現，然後吸引我過嚟揾你。
當我嚟到學校，兩個惡鬼只係煙霧，你想知我到底會點樣出手，睇清楚我既驅魔能力。
我有冇講錯，魔靈？」
「Bingo～楊氏第十二代驅魔師，果然頭腦都唔簡單，叻仔～」魔靈拍手叫好，講：「我呀～個人好心急！自從個一日起，我一直儲緊魔力。當我再次見到你，就知魔力係時候要歸位，今日你就要還返隻靚靚既～綠眼比我！」
「憑我實力，我絕對可以運用好你既魔力。」
「你真係咁樣諗？」
「你想講咩？」話畢，眼前突然出現多個魔靈。
「呢個就係你眼既魔力⋯⋯哈哈哈哈哈！！！！！」
10個魔靈，就有10張猙獰臉孔，10把尖叫笑聲，佢地同時襲擊我。
魔靈反操控我眼內既魔力，先會產生既幻覺。
「我一定揾到真正既⋯⋯魔靈⋯⋯」我緊閉右眼，左眼景象同右眼竟然一樣？
「等我搞掂埋你，我就有4個人可以食用，唔係⋯⋯計埋你隻眼，係14個人先啱！終於可以變返人啦！！！！」
「點解會咁？」我後退一步，心臟怦怦地跳動。
「因為你隻右眼跟左你10年，一早同你神經系統密不可分，你用左眼睇野都唔會有用，你受死啦！！！！！」魔靈準備吸食我既時候，身後傳來一聲巨響。
「澄？」