變成女鬼既我，剩返30日要出POOL！: （二十四）夢（4）

「阿傲，如果過左55分鐘，淽澄都未醒，到時你就負責叫醒淽澄；淽澄，你有1個鐘時間，呢個漏斗係代表夢中時間，你帶係身上。當你聽到阿傲叫你走，你要5分鐘內離開夢境，即使救唔到阿炫都好。」楊媽講。
 
「我今次目的就係帶阿炫走，點可以一個人返嚟！」
 
「如果5分鐘內你唔走，你就會灰飛煙滅，成為魔靈既養分，佢會吸食普通鬼，你靈氣只可以撐一個鐘。」
 
「咁阿炫？」
 
「我同叔叔點都會揾到辦法，你放心去，我只係講定最壞情況。」
 




「Aria，阿炫就靠晒你啦！」阿傲舉起拳頭，我緊握拳頭碰下去。
 
「你地放心啦！阿炫會平安冇事返嚟！」我拍著胸口。
 
呢句係我現實世界中講既最後一句說話。
 
當我睜開眼睛，眼前一片樹林。
 
我企起身，下面樹枝發出喀嚓喀嚓既聲音。
 




呢度係邊到嚟？
 
我走遍四周，見到一隻橙色貓咪正在奔跑。佢毛色光滑，有啲肉地，睇落唔似野貓同流流貓，係主人精心飼養既家貓。
 
我跪在地上，拍拍手掌，貓咪停在我既前方。
 
我摸摸貓咪頭頂，問：「你有冇見過黑髮綠眼既人？」
 
「喵～喵～」貓咪向後跑。
 




「喂！等埋呀！」我急速追住貓咪既步伐，然後貓咪停係透明啫喱牆前。
 
「行過呢度，我就可以見到阿炫？」
 
「喵～喵～」貓咪停留原地。
 
我跨越啫喱牆，對面既貓咪凝視著我。
 
我繼續向前行，見到肥嘟嘟既小朋友同貓咪玩得好開心。
 
呢隻貓咪係頭先個隻帶路貓？
 
我回頭一望，對面牆既貓咪已經消失。
 
「唔好意思，我想問你地有冇見過全黑衫既男仔，大約同我差唔多年紀？」




 
「冇喎！姐姐你蕩失路呀？」小朋友回答。
 
我立刻衝去房間，恰巧見到小學楊燦炫既相，佢笑容滿面，係村屋前抱住一隻橘黃色既小貓咪，物似主人形，連隻貓都肥嘟嘟，好得意！
 
「哇！你細個原來係肥仔！」仔細一望，原來佢細個冇戴眼罩。
 
相中小朋友重疊在眼前，我問：「小朋友，你……係楊燦炫？」
 
「你係邊個！點知我叫咩名！」小炫立即退後。
 
要點樣講，小炫先會放下戒心？
 
「因為……我係你10年後既女朋友囉！」我衝口而出。
 




「女朋友？咁我地點識㗎！」
 
「學校囉～你有冇見過黑……」
 
「小炫！」性感女人迎面而來，正是魔靈。
 
「魔靈！你條仆街！阿炫去左邊？」我喊。
 
「小炫咪係呢到。」
 
「你唔好講大話喎！阿炫就係因為你先入廠！」我推魔靈落地。
 
「喂！就算你係我未來女朋友，你都唔可以推人地落地！」小炫即刻擋喺魔靈前面。
 
身後既魔靈嘴角偷偷向上揚，講：「小炫，唔緊要，我冇事。」




 
「你聽我講，佢唔係咩好人⋯⋯唔係⋯⋯係好鬼先啱！點解你會癡埋佢到！」
 
「你先唔係好人，老師教我地，你整到人受傷，就一定要講對唔住。」
 
「你要我同佢講對唔住？」我忍唔住提高聲量。
 
「純真姐姐，我地走！」小炫扶起魔靈離開。
 
結果我不但揾唔到阿炫，仲同小炫交惡。
 
我望向漏斗，10分鐘過去。
 
前面係無限既樹林，如果係阿炫，佢一定唔會係最前同最後，實係會睇到全景既地方。
 




佢會喺我後面！
 
我抬頭一望，上面有個山坡。
 
我不斷向後奔跑，然後爬上山坡。
 
眼前既阿炫臉青唇白，眼神空洞。
 
「阿炫！」
 
「阿炫呀！」
 
「楊燦炫！」我不斷搖晃阿炫既肩膞，令佢正視我。
 
「冇可能⋯⋯所有野都冇辦法改變⋯⋯實係留喺夢太耐，令我產生幻覺，阿澄又點會出現喺到⋯⋯」阿炫仍垂下頭。
 
我雙手捧著阿炫既臉頰，阿炫流露驚慌既眼神。
 
「我係現實世界入嚟你個夢，自從火災意外，你就昏迷不醒，已經持續左一個星期。你睇下，我頸上掛住既黑雞，就係證據！仲有紅繩呀！」
 
「黑雞⋯⋯你係真既阿澄，冇比魔靈操控既人。」阿炫一手將我擁入懷裏。
 
我愣一愣，然後拍佢肩膞並講：「唔洗驚，我係呢到。」
 
我既頭埋在阿炫既胸膛中，感覺好温暖，同埋佢既臂彎好結實，好有男友力。
 
男友力？男朋友？阿炫？
 
「望夠未？」楊燦炫冷酷地講。
 
「邊個……邊個望你！我望緊你眼罩咋！仲有呀⋯⋯明明⋯⋯明明你望我先！」
 
我同阿炫第一次近距離對望；
 
為了取得平衡，我捉住楊燦炫既手腕，然後雙雙墜落床上。
 
嘴上有軟綿綿既感覺，回過神，楊燦炫正望住我。
 
我同佢⋯⋯Kiss左？
 
我既初吻比左阿炫；
 
「我可唔可以叫你阿炫？成日叫你全名，好似好唔熟，話晒我地都算出生入死既朋友呀～」
 
「好，阿澄。」
 
我地開始變熟；
 
「真係得咩？我好驚呀，阿炫⋯⋯我驚⋯⋯我驚萬一冇經驗，搞到你比惡鬼殺左⋯⋯咁點算？」我既聲音顫抖。
 
「阿澄，睇嚟你唔記得我家族背景，我阿爸、阿爺，太公，都係驅魔師，只係一隻普通惡鬼點會難到我？」阿炫用自信既語氣講。
 
第一次同阿炫一齊殺惡鬼；
 
「咁你係咪要上我身，同你父母講以上說話？」
「我唔識你父母，仲有零用錢唔夠請佢地去東京。Toy Story如果想睇先，要識內部職員。」
 
「邊個叫你請佢地東京？仲有你識Toy Story內部職員咩！你學生邊有咁多錢！」
 
每次有唔開心既時候，阿炫都會係我身邊，用佢既方式去安慰我。
 
我一早就唔鍾意阿樂，依家鍾意既人係阿炫？！
 
「阿澄，你係咪唔舒服，成身咁熱，塊臉仲紅晒？」阿炫摸我額頭。
 
我立即退後，眼神閃避講：「鬼又點會唔舒服呢？我地淨係得50分鐘，Uncle同Auntie係出面等緊你。」
 
「我係到已經唔知幾耐，夢境只係不斷重播小葵當時出事既時候。我試過走，但唔成功；我亦都試過想改變夢境內容，但細個既我根本睇我唔到。」
 
「唔係喎，小炫睇到我喎！頭先我仲同佢傾偈。」
 
阿炫思考數秒講：「呢到由魔靈創造，我本質係人類靈魂，而你同魔靈本質上都係鬼魂，靈體共通下你先可以改變到夢境內容。」
 
「咁我知我地點離開呢到！我有信心，可以帶到你出去！你信唔信我？」我用堅定既眼神望住阿炫。
 
「我信你。」
 
「我需要知道你既過去，先可以幫到你。」
 
阿炫深呼吸後，就將佢既過去傾盤托出。聽完之後，我覺得魔靈真係不折不扣既仆街，因為魔靈同楊爸有恩怨，魔靈先執著於阿炫。
 
「今次唔係困局，而係機會，我地一齊改寫，你同小葵既結局。」
 
我望一望手上既紅繩，已經黑到一半。
 
我主動牽起阿炫既手，咧嘴一笑，然後講：「剩低既時間，你都要跟住我行動，唔好鬆手，諗住再獨自行動！」
 
呢個係阿炫既機會，亦都係我既機會，既然時間無多，就好好享受夢中一切。