《廢柴人生》: 02 我的名字

02 我的名字

「費柴軒先生，請到六號窗。」

「下一位，費柴軒先生，到你睇醫生。」

每次喺公眾場合畀人嗌名，總會聽到周圍嘅人竊竊私語，仲有啲會大聲笑出嚟。我真係恭喜我自己同埋多謝爸爸媽媽，冇你哋嘅支持，我真係冇可能去到邊都成為群眾嘅焦點。

所以，平時出街我都戴住cap帽，費事畀人點相。啲街坊街里真係好好禮貌，又鍾意老遠見你就即刻大叫你個名，真係避都避唔到。





呢排去見工又係咁，啲人第一次見到呢個名，成份CV咩都睇唔到㗎，淨係見到我個名。真係激死人。

「你叫做費柴⋯⋯軒係咪？」經理講完之後陰陰嘴笑。坐喺隔離嘅人應該係老闆，揸住我份CV捂住個嘴，膊頭有少少抽搐。呢個人，相當有取笑我嘅嫌疑！

「你覺得你可以幫我哋公司做啲乜？你得High Dip畢業，又冇咩特別技能。我哋點解要請你？」

我都唔記得咗我答咗啲咩，只係記得我好努力咁hard sell自己。不過佢哋一路聽一路陰陰嘴咁笑，我諗今次面試應該凍過水喇。

其實，係咪啲人好易先入為主？見到我個名係咪「廢柴」諧音，就認定咗我就係一條不折不扣嘅廢柴。






——