《廢柴人生》

01 族譜與我

我姓「費」，由我有記憶開始，老豆就教我哋個姓氏讀音係「肺 fai3」，而唔讀「秘 bei3」。點解有「秘」唔讀，要讀「肺」呀？為咗呢件事，我有同佢拗過，我話「費」用作姓氏，應該係讀「秘」，但係佢好堅持我哋係讀「肺」。

好衰唔衰，我屋企要跟族譜改名。到我呢代，每個人中間個字都要係個柴字，所以我全名叫「費柴軒」。

即係咁，究竟係邊鬼個寫族譜㗎？明知我哋個「費」字讀「肺」，你就唔好用個「柴」字啦⋯⋯我諗嗰個人都係唔識㗎喇，因為我老豆嗰代，係「飯」，對上係「麵」⋯⋯係呀，你估中喇，再對上，係「粥」同「粉」⋯⋯

唔知係唔係我哋家族寫族譜嘅時候實在太貧窮，有紀錄以嚟，第一至四代就係「粥粉麵飯」。我老豆叫「費飯忠」，姑姐叫「費飯婉」。





我係新一代嘅開始，用「柴米油鹽醬醋茶」排落去。望落最正常，就係「米」。好彩我個仔將來，都可以叫做Mike或者Michael，唔使好似我哋呢一輩咁，慘到貼地。

點解偏偏我係「柴」呀⋯⋯以前日日返學都畀同學笑，就連老師都⋯⋯唉⋯⋯


——