《廢柴人生》: 03 落舖幫手

03 落舖幫手

畢業後到而家，差唔多半年，已經去過好多間公羿面試。不過，全部都冇聲氣、冇回覆，真係一間都冇，等消息等到天荒地老，都係打定輸數吧。

所以到而家都仲繼續搵緊工，呢段期間，我就喺老豆間茶餐廳度打躉。

「費柴！三號枱送餐呀！」老豆喺水吧嗰度大叫，叫完又去整奶茶。

「我叫Hinson呀！」我離開我個卡位，一邊同老豆頂嘴，一邊走過去水吧，拎咗個餐蛋治同熱咖啡去三號枱。





「你姓費㗎，唔好唔記得。」老豆真係有啲九唔搭八。

「我一定唔會唔記得囉，個姓咁特別，真係多謝晒。」

我送完餐又返去卡位坐，喺我後面就係收銀，阿媽伸手扑一下我個頭：「你幫手睇場就跟足啲啦，個餐出咗三分鐘都唔拎。」

「又唔係做澳牛，慢慢嚟都得啦。」我望望三號枱嘅陳伯，佢放低咗份報紙，然後郁都唔郁，淨係望住杯熱咖啡：「你睇吓佢，又唔趕時間嘅。」

「咁送咗先吖嘛，如果客人投訴凍咗，咁又要再整過，嘥晒啲錢。仲有呀⋯⋯」阿媽又喺度吟吟沉沉，我都冇聽到佢後面講咩喇。





「得喇得喇。」我check緊email，重新整理咗好多次，都未有公司send email過嚟。

我放低個電話，望住呢個得八個四人卡位，中間有三張圓枱嘅茶餐廳，心諗，唔通我要喺度過世？唔好啦，我啱啱畢業，以前啲比賽都攞過好多獎，唔應該留喺呢間「飯忠茶餐廳」囉⋯⋯


——