《廢柴人生》: 18 生人物近

18 生人物近

嵐姐全日都黑住面，阿A阿B又唔知頭唔知路，唔識得睇眉頭眼額，搞到嵐姐好燥底。

「咪講咗好多次囉，仲問？」嵐姐眼尾都冇望過佢哋一眼，指住我：「你同我搞掂佢哋啦，唔好煩我！」

吓？搞掂啲咩呀？我咩都唔知㗎喎⋯⋯但係阿A同阿B好無辜咁望住我，好似要我拯救佢哋咁。所以我揚揚手叫佢哋過嚟，睇吓佢哋個proposal。

如是者，成日流流長，嵐姐都冇再同我哋講嘢。要交嘢畀嵐姐，都係由我去處理。阿A同阿B都話好驚，唔敢交過去。





「唔該你吖Hinson！」「你係我哋嘅守護神呀！」

好啦⋯⋯我嚟啦咁⋯⋯

我吞啖口水，喺printer度拎咗份嘢，釘好，拎去嵐姐枱頭：「嵐姐，佢哋份proposal，呢份係紙紥鋪，呢份係麻雀鋪嘅。」

嵐姐咪住對眼望一望我，拎咗份嘢去揭。一邊揭，一邊用紅筆圈出有問題嘅位，幾乎每一版都有錯誤。

佢嘆咗口氣，合埋兩份proposal，拎咗張posit，大大力咁寫「Fail！」，然後貼咗喺proposal上面。





我拎返份proposal：「下次我睇完先再畀你睇。」

嵐姐低沉咁應我一聲：「唔！」

我轉身，見到阿A阿B匿埋咗喺我張枱下面，突咗半塊面喺枱面上。哈哈，個場景好搞笑，好似《侏羅紀公園》避恐龍咁。我忍住我有啲低嘅笑點，一邊搣走張posit，一邊行埋去，同佢哋講返份proposal要改啲咩。

搞咗好耐，八點幾先放工。

臨走時候，我見到嵐姐啲長髮放晒落嚟，雙手叉入啲頭髮入面，搞到個頭好亂，戴咗副黑框眼鏡，好苦惱咁望住部電腦。





佢會唔會又喺公司通頂㗎？聽阿A同阿B講，因為嵐姐嘅工作量太多，做唔切，搞到佢成日都喺公司瞓。

於是，我走入pantry沖咗杯熱朱古力，行去嵐姐枱面放低：「嵐姐，飲杯嘢先再做啦。我有冇嘢可以幫你手？」

佢望一望我，雙目無神，鏡片下嘅黑眼圈又黑又深。同今朝個樣比，殘咗二十年都有。佢舉起手，用好細嘅幅度向我say byebye，連講嘢嘅力都唔想用。如果唔係office燈火通明，我真係懷疑自己撞鬼。

「咁我⋯⋯走先？」我有啲猶豫，想留低幫佢手。

「嗯。」

佢雙手拎起咗杯熱朱古力，放喺嘴邊，蒸氣隨即覆蓋咗佢大半塊鏡片。佢用手指捽捽鏡片，然後吹氣。

突然，我個腦海入面閃咗一下。

呢個畫面，點解好似似曾相識咁嘅，喺邊度見過？





——