《廢柴人生》: 17 招攬內鬼

17 招攬內鬼

呢個唔知要幾耐嘅會，真係好冇效率，一味淨係聽偉樂同大亨啲人講嘢，吹到自己個集團有幾勁，仲要聽住藍總同彭總互相吹噓，講佢哋上次嗰場golf有幾好玩。

嵐姐喺開會期間，手不停畫圖。佢已經開始設計緊嗰十個商場。醒目嘅我，傳咗張posit畀佢，同佢講我都一齊諗。

佢見到張memo之後，嘴角微微向上笑咗一笑。喺張posit度寫低：『最尾嗰兩個，OK？』再傳返畀我。

我收到之後，點咗下頭。將posit貼喺簿仔嘅封面內頁，開始我第一個正式嘅商場設計。





個會足足開咗兩個幾鐘，終於散會。我同家姐、阿勞打咗個眼色，佢哋就跟大隊走咗。

我跟住嵐姐走，交咗本筆記畀佢：「嵐姐，你睇吓有冇嘢要改。」其實我都唔知設計一個商場，真正要考慮嘅事要去到幾深入，我只係跟住我嘅自由意志去設計。

嵐姐邊睇邊點頭，直到赫哥走過嚟，佢即刻冚埋本簿。

赫哥同嵐姐講：「大亨嗰邊咁睇得起你，你咪畀心機做囉。不過咁，如果你哋做唔掂，你出句聲，我哋絕對可以伸出援手嘅。」

「唔使你咁好心。」嵐姐執好晒啲嘢，同我講：「我哋返去做嘢。」





「哦。」

我跟住嵐姐走出會議室，偉樂就截住咗喺嵐姐前面：「綽嵐，上次食飯講嘅嘢，你諗成點？」

嵐姐扮聽唔到咁，想喺偉樂同門邊之間走過去，但係偉樂再截住佢：「可唔可以同你單獨傾吓？」

「有咩喺度講。」嵐姐不耐煩嘅眼神，雙手抱住啲筆記簿同電腦。

偉樂望望我同埋赫哥，然後赫哥拉埋我喺另一邊門口走，淨返佢兩個喺會議室入面。





行到出去，我問：「赫哥，其實佢哋兩個係咩關係？」

赫哥話：「你想知？」

「嗯。」我點點頭。

赫哥搭住我膊頭，哄埋嚟同我講：「做我條針，我就話你知。」

「針？」我碌大隻眼，佢要收我做𡃁？其實我都唔係返咗好耐工啫，已經feel到呢間公司唔係好對路，全部人都怪怪地咁。赫哥同嵐姐之間已經好明顯係勾心鬥角，唔通真係個個人都係各懷鬼胎？好黑暗呀⋯⋯

「好簡單，之後你哋有啲咩圖呀，proposal咁，BCC一份俾我就得。」赫哥摵起條眉，笑得好樣衰：「冇咩嘅，你新人吖嘛，我好樂意俾啲意見你㗎。」

佢咁講啫，但係人都知佢想chok料啦，我唔係蠢㗎。不過赫哥嗰邊人強馬壯，嵐姐好明顯係處於弱勢，好難鬥。

不過，我唔想嵐姐畀人恰到上心口。所以我答佢：「咁樣，好似唔係咁好喎。」





「你諗諗啦，有你著數。」赫哥拍拍我背脊，然後懶有型咁一邊退後行，一邊對住我做口型：「我會照住你！」

——