《我個老友從未來穿越返嚟，話我會愛上一個Kam女》: 003

當晚，我返到屋企，真係俾我見到震撼性嘅一幕…… 痴撚線，真係㗎？ 我一返到嚟，就見有個陌生嘅男人坐係我屋企個沙發度，我呀媽好勞氣咁講到一半：「總之你唔好……」 見到我返嚟之後，即刻收咗聲。 我一行入屋企，唔知點解比起平時更加寒冷，有啲唔似平時開冷氣嗰種。因為開冷氣會係皮膚感受到，同埋係舒服嘅，但呢種寒冷係凍到入骨，係令人唔舒服。 我見氣氛有啲唔係好對路，除低鞋之後，呀媽靜完之後，示意我過去。 「仔，你……過一過嚟啊。」我心知不妙，然後仲係心入面瑩住瑩住唐師兄啱啱講嗰段說話。 呢個男人就係我老豆？ 「佢係⋯⋯？」我膽戰心驚地問。 「我無打算瞞你，我覺得你都差唔多要知。」呀媽深呼吸咗一下，接住講：「佢係你親生呀爸。」 我如雷轟頂，幾重資訊轟埋嚟⋯⋯ 首先，我要點迎接呢個親生老豆？其次係，唐師兄真係堅㗎？真係從未來穿越返嚟？因為真係無可能咁精準預計得到呢件事？同埋我真係會如佢所講，我會鍾意上叮噹呢個Kam女？ 我講一講叮噹呢個Kam女先，佢唔係啲咩怪獸嚟，只不過係普普通通一個女仔，稱唔上靚。 但係佢平時嘅行為，真係幾神神化化，係其他人眼中，就係有啲唔知佢做乜，奇怪且難溝通。 點解會話佢神神化化呢，佢「叮噹」呢個名唔係指佢好似哆啦A夢，而係佢背包經常性掛住一個叮噹。 逢係佢返學、放學，都會聽到「叮噹、叮噹」嘅聲音。有次有同學喺無人行嘅商場入面，聽到呢個「叮噹」聲，嚇到仆街。 點知轉個角見到「叮噹」係度行街。 同埋叮噹係會有好多唔同嘅符咒帶係身度，有同學見到佢課本入面夾咗張符，嚇到仆街！ 佢仲會有時同空氣講嘢，我哋全班都驚到唔知點同佢接觸，加上佢講嘢一舊雲咁，就顯得更加Kam。 所以我真係想像唔到我會愛上呢個「叮噹」。 拉返嚟依家先，我個腦快速咁轉頭，但係我講唔出一句說話。 「我唔知點解釋，因為我都唔知佢點解會突然之間出現，我都未搞得清個情況，你就已經返咗嚟。」 「佢真係我老豆？」我望住呢個陌生嘅男人，完全俾唔到一個親切感，同埋老豆嘅模樣同埋想像俾我。 「仔，原來你都咁大個啦？」佢扮上一個「好老豆」嘅樣。 「你讀書讀成點啊？」佢故作輕鬆。 但呢個絕對唔係咁輕易嘅事。對於一個同呀媽相依為命咗咁多年，而佢咩責任都無負過，從來都無出現過喺我世界入面，我點樣接受突如其來嘅「老豆」？ 同埋我唔需要囉！本來我同老媽子生活得好地地，做咩嚟打亂我嘅生活？ 我有唐師兄、唐媽媽，老媽子又錫我，我已經好知足。 「關你撚事咩？」我拋低咗呢句之後，就頭也不回咁走出屋企，就連呀媽嗌住我，我都無理到。 我落樓去搵唐師兄，去到佢屋企，諗住搵佢訴苦，同埋想同佢講，我信佢真係由未來穿越返嚟啦…… 但點知去到，唐姨話佢去咗補習，唔係屋企。 我先醒起，係喎！臨走前佢有講過陣間要去補習，我都唔記得咗件事。 搵唔到唐師兄，我一時之間唔知點算，更加唔返嗰個屋企住。 於是乎就係街度無所事事咁周圍行，期間電話響過好多次，全部都係我呀媽打嚟搵我，但係我唔想聽。 我百無聊賴咁係街度行，行過一條又一條街，漫無目的。 終於我行到離屋企偏遠嘅一個公園，個思緒仲諗緊多咗個老豆點算，明明嗰啲係好開心，破鏡重圓㗎嘛應該。 但我開心唔起，甚至乎唔知點解有種不祥嘅預感。 然後我就咁坐咗係公園個長凳度，諗住就咁坐係度啦，順便整理一下自己混亂嘅思緒。 「叮噹——叮噹——」 呢把聲即刻令我背後嘅毛孔豎起，瞬時感到毛骨悚然起上嚟。 我即刻望去後面，不停地掃視，望到一個唔熟悉，但我識嘅身形。 當我再望真啲嘅時候，我呆咗係度，個口得個洞。 Kam女就係對面街。