《我個老友從未來穿越返嚟，話我會愛上一個Kam女》: 004

我哋相隔咗一條街，Kam女係無留意到我。始終我哋同一個班，撞到唔出奇，但係今日聽完唐師兄咁講之後，我先咁留意佢。

如果我唔知呢件事，我諗我唔會咁上心。

同樣地，如果唐師兄無同我「預言」到我老豆返咗嚟，我係無心理準備下，係咪會更不知所措呢？

我留意叮噹揹住嗰個出名嘅「鈴噹」書包，行入一間紙紮鋪度，然後放低書包，幫鋪頭入面打點一切，執拾下呢樣嗰樣。

原來呢度係佢間鋪嚟，入面擺滿傳統嘅紙衣，有跑車、手機等等嘅紙公仔，又有香燭同冥鈔、拜神套裝包、法器同辟邪用品等等，算係幾應有盡有。





店出面仲擺有「門口土地財神」神位，入面則設有觀音嘅神位，點燃着香火，煙霧瀰漫。

我見到之後，更加好奇，我究竟會鍾意Kam女啲咩呢？

心諗真係無可能喎！係男人都鍾意靚女㗎啦？

班上面公認嘅女神，我成日都偷望佢，周芷桐有齊曬討人鍾意嘅元素。靚啦，笑起嚟又甜，高高瘦瘦，又有仙氣。

而且我知道我同唐師兄都鍾意佢！只不過我哋無講出嚟姐。





所以我真係想像唔到我會沉呢個Kam女嘅船，無辦法相信。

猛地，係鋪頭嘅Kam女，望住我呢方向，死勾勾地望住。

我：？？？？？？

佢嘅視線無移走，留低尷尬嘅我。

我無數錯的話，佢係足足望咗我半分鐘⋯⋯





一種Kam感由心散發出嚟，擴散到我全身。下一秒，叮噹就向我揮揮手。

我：？？？？？？？

我指一指自己，確認下係咪叫我。

叮噹點點頭，示意叫我過去。

我：？？？？？？？

咩事啊屌？做咩無啦啦叫我過去？佢又發現到我嘅？

呢個公園仔好近馬路，而仔馬路係一條單行線，所以個距離又唔係去到好遠，但正常邊有人會留意坐係公園長凳嘅人啊？

我百思不得其解，但係我身體又不自覺咁行過去，成件事好Kam，包括我自己。





我行到叮噹面前，等緊佢開口。

…………

???????

佢一句聲都無出過，亦都無開口。

咩事啊？我會錯意啊唔通？如果係我會錯意，我真係柒撚到仆街喎唔係講笑。

「你叫我？」我終於忍唔住呢個咁死寂嘅空氣。

「你有舊嘢。」佢面無表情咁講。





佢係咪想搞爛gag？想講我有啲靚仔？有啲可愛？想撩我？

「有舊咩啊？」我反應有啲大。

佢繼續唔出聲，係度執緊個鋪頭。

我就嚟俾佢搞到痴線！！！係咁吊我條癮，痴媽根！

過咗一陣，佢喺佢件衫度拎咗樣嘢出嚟，跟住塞落我條褲度，真係直接塞入嚟，塞到有啲入，入到就嚟差啲掂到我沉睡嘅巨龍。

我當堂嚇咗一跳！！

「你做咩啊？」我大驚失色。

我感覺到佢塞咗啲嘢入嚟，於是我即刻伸入去，拎返出嚟。





係一道符，寫住護身符。

我唔識點反應，仲load緊發生咩事，叮噹就開聲：「呢排你屋企係咪有陌生人？」

我正想答無嘅時候，然後即刻諗返起啱啱嘅事，我個「親生老豆」就係佢所講嘅陌生人啦。

「你⋯⋯你點知㗎？」

「舊嘢就係你頭上面嘅黑氣，你都可以話係能量場。」叮噹冷靜地講。

「姐係點啊？呢個符係俾我驅黑氣？」