《我個老友從未來穿越返嚟，話我會愛上一個Kam女》: 005

「你自己小心屋企嘅陌生人啦，來歷不明嘅人你係唔知會帶啲咩俾你。」

「呢個係開過光㗎，有能量㗎，可以抗衡你嗰團能量。」

語畢，叮噹攞出個小型掃把仔出嚟，嚟掃架上面啲灰塵。

「個符唔係俾係驅邪，係俾你防止啲不明來歷嘅靈體嚟搞你，至於你屋企嗰個陌生人會點樣，就你自己處理啦。」佢一邊講一邊掃，掃掃下，掃埋嚟我度。

直接不客氣地掃上我件校服度。





「屌！」我情不自禁咁爆咗句粗口，嚇到我後退咗一步。

叮噹面不改容咁又掃多下，好明顯佢係想掃鳩我走⋯⋯

佢無再多講啲咩，反而鋪頭入面傳嚟一把慈祥嘅聲線，講道：「小婷，係咪有嘢入咗嚟啊？」

佢係用「嘢」嚟形容，唔係用「人」？

姐係我身上真係有啲嘢？我唔係好信⋯⋯





我本身就係一個無神論者，我唔係好信啲神神怪怪嘅嘢，一嚟我無親眼見過啦，二嚟都係覺得寧可信其有，不可信其無，我無接觸就一律當無。

「無嘢啦，我趕走咗啦。」叮噹溫柔地向入面回應。

然後佢又係我面前掃多下，呢下真係趕我走啦。

我最後拎住個符，識趣地離開鋪頭。

我去咗第二度流連，我係街度不停諗返起頭先件事，反覆細味叮噹嗰番說話。





姐係我屋企依家有啲邪嘢?我自己都有?

我唔係好想要，但又唔夠膽就咁掉咗佢。

直至收到唐師兄whatsapp。

「你搵我？」

「頭先我去咗補習，穿越返到嚟咩都唔識，哈哈！」佢加個笑喊emoji。

「你依家係屋企？」我開始相信佢講穿越呢件事了，但我仲有一堆問題想問佢啊頂！！！

「啱啱返到啊，咩事？」

「我依家過嚟搵你！」得知佢係屋企之後，即刻唔係街鳩fing了，9秒9衝去佢屋企。





唐師兄屋企真係我第二個屋企嚟，有時呀媽返工，我多數都係痴係呢度，唐姨都習慣曬，我同唐師兄孖鋪又試過，呢度亦都有我啲衫係度，係隨時可以俾我換衫，係度瞓添。

唐姨都知我老媽一個人湊住我唔容易，老豆又無咗影，獨木難支，所以佢都會出分力照顧我，同埋唐師兄都有個伴。

其實佢先係我個伴。

我熟悉咁㩒佢屋企個門鈴，係唐叔開門。

「謙仔，嚟搵軒仔啊？」

啊，唔記得介紹返，我全名係李俊謙，唐師兄全名係唐嘉軒，所以屋企人都叫開乜仔乜仔咁樣。

「係啊，佢係度嗎？」





唐叔好順手開門俾我，答我：「佢啱啱返嚟咋，留唔留低食飯啊？」

「嗯⋯⋯好啊！」我諗一諗，我都係唔想咁快返上去住，我唔知我親生老豆仲係咪度，我唔想佢係度啊！

講完之後，我就衝入去唐師兄間房度。

一打開度門，只見唐師兄有啲輕挑，帶住一絲囂張嘅眼神咁望住我。

「終於信啦？」佢個得戚樣，串到呢，好明顯係睇穿咗我咁急搵佢，已經證實咗佢講嘅嘢係啱，所以先咁撚有自信。

「你係點返嚟㗎？！」我坐係佢個電腦椅度。

「唔話得你知㗎，天機不可洩漏，哈哈！」

「我屌你啦，唔洩露得嘅話你又講我老豆返咗嚟？」我反駁佢。





「如果你唔係點信啊？」佢仲陰陰嘴笑。

「咁你點解返嚟先？正常唔會無啦啦返到過去㗎？就算想，都唔係你話返就返㗎喎！」我一口氣將我心入面嘅疑問，問曬出嚟。

「我⋯⋯想彌補返一啲遺憾囉。」佢終於收起個笑容，頓咗一下，然後正經咁答我。