《我個老友從未來穿越返嚟，話我會愛上一個Kam女》: 006

「遺憾？」我想像唔到唐師兄之後會發生啲咩事，睇嚟係勁到佢一直都擺係心，要返嚟過去解決返？

「咩遺憾嚟㗎。」我追問。

佢直勾勾咁望住我，我唔明白個眼神係咩用意，我後來經過好多事情砸回望返，先明白呢一刻嘅用意，係有幾意味深長。

但此刻嘅我，淨係諗到個遺憾可能係因為某個女仔。

「唔話你知喎！」佢諗住拎部手機出嚟碌。





「屌你！一定係為女啦，學健三咁樣啊？穿越返嚟阻人哋結婚？」我笑鳩佢。

「為咗周芷桐啊？」我繼續打趣道。

「因為之後俾我溝咗？唔忿氣啊？」

「痴線啦！最好你溝到，都話咗你係會鍾意Kam妹囉！」唐師兄再次提起呢個「預言」。

「唉！你唔好再提啦，我真係無辦法相信啊⋯⋯我點會鍾意上佢？」





「同埋我頭先喺街度撞到佢！佢個人真係好撚奇怪。」講完我就拎出頭先叮噹俾我個平安符。

「嗱！佢話我嗱有舊黑氣，然後就格硬塞咗呢個符俾我，我又唔信嘅，唔信嘅話啲嘢又點會靈啊？」我真係有啲嫌棄，我唔係好想收囉。

唐師兄面色有啲遲疑，講：「我勸你都係收咗佢好啲。」

「下？點解啊？」我不解。

「信我啦，我唔會害你。」唐師兄收起講笑mode。





「但我真係唔想要呢⋯⋯一係咁啦，我擺係你度！呢度係我第二個屋企嚟㗎嘛，係咪？有咩事我咪搵你囉？」我不禁為自己諗得咁周全而沾沾自喜。

「其實叮噹唔Kam㗎⋯⋯你遲下就知。」唐師兄想拒絕我呢個諗法，不惜出口術。

「唔好兜啦！就咁話啦，出去食飯先！好耐無食你屋企嘅飯啦。」

因為都夜，唐姨同唐叔好快拎到啲餸出嚟，我哋好似真正一家人咁坐定定食飯。

佢哋唔係咩都就曬我㗎，有時見我唔啱呢，都會出聲話我，但係都知佢哋係為我好先會出聲嘅，代我呀媽教育下我。

我將我親生老豆返嚟嘅事，同埋煩惱嘅事同佢哋講。

講真，我都唔知點算啊⋯⋯

「真係？」





「咩話？」

佢哋兩個反應一樣，但講嘅唔一樣。

「咁你呀媽點樣啊？有咩反應啊？有無講啲咩啊？」唐姨好緊張咁問。

「我聽到佢哋似乎係嘈緊，我就無聽得好仔細，但我返到去無幾耐就走咗，我唔係好接受到佢。」我坦白地講曬出嚟。

「當然啦，佢咁突然出現返喺你哋面前，同埋你哋依家都生活得好好地月，你唔知佢返嚟係好事定壞事，可以係帶麻煩返嚟㗎喎。」唐叔安慰我。

「所以我都唔知，我頭先第一下諗法就係想離開呢個屋企，唔想返去面對。」

「咁你今晚打算點？要唔要係度瞓啊？」唐姨關心地說。





我食埋幾啖飯，遲疑咗一陣，講：「唔啦，多謝你唐姨姨，但我都係返一返屋企，我最後都會擔心呀媽唔知點，嗰個男人我就唔理啦。」

「好，你有咩事隨時過嚟都得㗎啦，呢度嘅大門永遠為你打開，哈哈！」雖然幾老土，但真係好窩心。

食完飯，我都入房hea咗陣，諗住再chock下唐師兄未來會發生啲咩事，但佢除咗我老豆會返嚟，同埋我會鍾意上Kam女之外，其他都隻字不提。

暫時佢依家預言命中率係50%。