《我個老友從未來穿越返嚟，話我會愛上一個Kam女》: 007

咁我由第二個角度入手去chock，就係問佢同周芷桐嘅嘢！

暫時我依家仲心心眼芷桐，但唔通喺未來世界唐師兄已經一早得米女神？？

令我失望嘅係，佢依然咩都唔透露。

屌！我都唔知佢返嚟做咩。

無癮的我都係返屋企算。





一入到屋，嗰股寒氣仍然仲有，有啲刺凍入骨咁。

呀媽已經坐咗係度睇電視，而屋企唔見咗嗰個男人嘅蹤影。

「個男人呢？」我叫唔出老豆呢個名。

「我叫咗佢返去啦，佢留係度都無意思，唔好話你，佢突然間咁殺出嚟，我都唔係好接受到。」

講真，老媽子算保養得幾好㗎啦，可能都叫做後生嘅時候生我，所以依家未係好睇得出話似一個媽咪，如果佢唔開口講，係無人會懷疑㗎。





我唔明老豆點解要放生媽咪，拋低佢自己生活，老媽對佢都算係咁啦，以佢嘅外貌，實可以有更好嘅選擇啦！

喺我嘅記憶入面，我都記得細細個老媽子係有唔少男人嘅追求，但唔知點解都無疾而終。

即使到依家，佢隨時有第二個男人都唔出奇，我覺得佢係值得擁有嘅生活。

「咁你點啊？」我問老媽。

「咩點啊？」佢裝傻。





「你仲留戀緊老豆？」

「痴線！都唔知你講咩，你毛都未生齊就唔好學人講咩情情愛愛啦！」好難睇唔出佢嘅口是心非。

「佢有咩咁值得你到依家都仲緊張佢呢？」我的確唔明，而且我一啲戀愛經驗都無，搞到我勁好奇個原因。

「你唔明㗎啦咁細個，等你再大個啲再話你知啦！」

「你自己搞掂啦，睇你呢個鐘數返嚟都食咗飯啦，唔洗理呀媽得㗎啦？」佢回覆返個長氣mode。

「你自己沖涼瞓啦！」講完，佢就行返入房，佢入房前，仲較細咗個冷氣，喃喃自語：「唔知做乜鬼咁凍，雖然大熱天時姐，但依家都凍到傻。」

係，我都感覺到好鬼凍，就算較細咗，都好似無暖和返。

直到我上床瞓，我都仲感覺到凍，但我已經無開到冷氣，淨係開風扇。





係我瞓到迷迷糊糊嘅時候，突然間聽到耳邊傳嚟一陣女人聲。

「點……解…要……咁樣對我？」有股寒氣吸係我耳邊。

我初頭以為係呀媽，但我呀媽講嘢無咁細聲，然後我張開雙眼，身邊竟是誰？

係無人。

頂！我即刻勁撚驚，咁係邊個講嘢？我發夢？

「點……解…要……咁樣對我？」嗰把女人聲又係我身邊縈迴。

「邊個？」我對於空氣問。





我問咗好幾聲，都無回應，我即刻開曬房入面嘅燈。

過咗10幾分鐘，亦無再聽到啲咩聲啦。

直到天光，我都瞓唔返，同時亦都無再聽到嗰把聲。

我成晚都反覆係度瞓，唔通Kam女講嘅都係真？屋企真係有嘢跟入嚟？以前嘅我無遇到，就可以話唔信，但我依家遇到啦喎……

我塊面俾人打到好撚腫，都係自己唔聽人講嘅後果嚟，仲要人哋個平安符都俾咗人，唔係自己身，依家奶撚曬嘢啦？

雖然我無受到任何物理傷害，但我精神上被KO得好西利。

我返到學校，勁眼瞓，成個人都不在狀態。

唐師兄今日遲遲都未返，班上面嘅同事仔陸續返到，而班房門口傳嚟一陣熟悉嘅「叮噹——叮噹——」。





唔洗問都知係邊個返嚟。

Kam女如往常一樣，無視眾人嘅眼光，獨自行去自己個座位。

以我嘅觀察，Kam女好似係學校無乜朋友咁，交談嘅人都唔多。

本身佢面無表情，但忽然間個視線望落我度，直勾勾咁望住我。