《我個老友從未來穿越返嚟，話我會愛上一個Kam女》: 008

我個心驚一驚，因為Kam女個眼神不懷好意……甚至有股殺氣。

未幾，叮噹放低咗個書包，然後向我行過嚟，嗰股殺氣直頭令我感覺到生命受到威脅。

你明唔明，佢係個視線從來無離開過我，但同時係向我兜緊埋嚟。

我捉實個書包，心跳加上，個人極緊張。

「你係咪無帶我俾你個護身符？」叮噹怒氣沖沖咁問我。





其他坐我前面嘅人見到，即刻望過嚟，一副食花生嘅樣。

「嗯……係啊。」我好坦白咁承認。

同時，我都好心虛，好似一個做錯嘅細路，咁的確係我唔啱在先嘅，佢都係為我好姐，係我自己唔信人，夜晚又奶野。

我就依家係一個知衰仔嘅狀態啦。

「奶嘢啦？」佢睇穿咗我，個語氣亦都係質問嚟。





我點點頭。

佢雙眼瞪住我，好似我激到佢講唔出嘢咁，然後佢每一下呼吸都好重。

「抵你死！」然後佢就咁拋低咗呢句，就返埋去佢個座位度。

佢怒氣沖沖嘅背影，我感受到佢嘅善良……

「嘩……佢搞咩啊？」前面位嗰兩個即刻同我八卦起上嚟。





「你唔覺佢kam kam地㗎嘛？」其中一個問我。

「無啦啦又發你脾氣，又成日帶住啲唔知咩符咁。」佢哋嘅說話係以前，我應該係會認同。

但我開始唔係咁睇？

「你唔知姐。」我唔想搞到咁僵，同時間我知道係自己衰，我今次唔想認同佢哋。

「唔知咩啊？」佢哋唔明。

「無嘢。」我由佢哋繼續唔明。

雖然有啲位佢係Kam Kam地，唔係太識人情世故，同人相處唔係好識捉到個方法，但有啲位卻感受到佢嘅善良。

加上，佢依家係咪嬲咗我？？？？





我目前個諗法係，希望唐師兄有帶我個符，可以還得到俾我，我就可以去同返叮噹講我有帶返啦，等佢莫生氣。

我正爭扎緊要唔要WhatsApp唐師兄嘅時候，佢就返咗嚟啦。

我第一時間衝去佢個位度！

「我個符呢？你有無帶係身？」佢書包都未放低，我就衝過去問。

「下？梗係無啦，我點會帶住你個符周圍走？你要嘅話自己返屋企前上我度拎囉！」

我個心即刻一沉，咁仆街啦。

我滿腦子都係叮噹嬲咗，都係自己抵死，無聽到佢講，到真係出事，先諗住有求於佢。





本來我唔信呢啲妖魔神怪，但當科學都解釋唔到現實嘅怪異，你就會開始慌，會更加唔知點算好。

再加上，我真係想問佢點算，但如果佢仲嬲緊，我問佢點搞一定仆街。

「喂？依家點算好啊？」頂⋯⋯唔通我真係咁問？咁樣我仲kam喎！

「你係啱嘅，但你仲睇唔睇我度黑氣？」都好怪喎！點講都好怪喎。

我用咗成個朝早去諗點樣同叮噹講嘢好。

直至lunch，我都未諗到最好嘅解決方法。

我哋學校lunch高form係可以出去食飯，成個中學生涯，我lunch必定係同唐師兄，無試過分開食，所以佢都會等埋我一齊食，有時我哋會買飯返學校食，有時會出去食。

咁今日我哋想買返嚟學校食，食完再去打下排球，因為我哋嘅共同女神芷桐好熱愛排球，周不時都會食完飯係操場打排球。





喺買完飯返去嘅路上，我都仲思索下晝有咩契機搵叮噹搭上話！

正當我思緒緊嘅時候，我嘅思緒飄下飄下，飄到去轉角位嘅一方，見到叮噹就係一個公園嘅角落，坐咗係地下，食緊一個老麥，然後係側邊望緊空氣。

我見到我哋級嘅人見到佢之後，都投以一個怪異嘅目光同埋神情。

「你今日自己食啦，我有啲事，我閃先。」我同唐師兄講。

我以為佢會阻止我，或者會問下咩事，但唐師兄好似已經知道曬咁樣，咩都無講，淨係對住我擺出一個奸笑嘅樣。