《我個老友從未來穿越返嚟，話我會愛上一個Kam女》: 009

我屌佢老母！！！係喎！佢知㗎喎！

佢就好似係等緊呢個時刻咁，然後一副「我最期待嘅畫面出現了.jpg」咁樣！

「好啊。」佢嘅回覆極其溫柔，真係激撚死我⋯⋯

「屌你啦！真係好想打柒你，哈哈。」我留低呢一句，就拎埋自己個飯，頭也原回咁行過對面。

我行到去叮噹隔離，佢抬頭望一望我。





佢忽然間流曬眼淚咁望住我，嘩我嚇一大跳。

「你⋯⋯做咩事喊啊？」我有啲慌。

佢嘅眼淚一遍又一遍咁滑落，佢見到我之後，好似無覺得失態咁拭走啲眼淚，反而當我無到。

我好想知咩事，但我知道依家唔係一個好嘅時機問。

我就咁同佢坐係公園嘅地下，打開個飯盒，享受呢個夠料嘅午餐。





「Sorry啊，係我之前唔信你講嘅嘢⋯⋯」我股起谷咗成個上晝嘅勇氣，同叮噹坦白。

「因為呢排發生咗好多荒謬嘅事，我好難一下子全部相信。」

「同埋啲人又講你⋯⋯」我無經大腦，諗到咩就講咩，但講完呢句之後，叮噹即時擰轉頭望住我。

係睥住我。

我近睇，其實叮噹幾可愛，一雙明眸嘅雙眼，好是精靈，個樣係可愛型，留住一個復古嘅齊陰，帶有幾粒屬於中學嘅青春痘，身型嬌小，但脾氣並唔小。





「講我咩啊？」佢凌厲嘅眼神直望我靈魂深處，我下意識都係覺得唔好同佢講大話，加上我今朝早又激嬲咗佢，我依家係嚟耍冧。

「佢哋話你Kam⋯⋯」我輕聲地講。

佢無出聲，今次拭乾啲眼淚，食多條薯條，就雙手擺係後面撐住地下，望住個天。

「我知啊。」佢重重地講出呢句。

我唔意外，不過我更加想知佢點睇。

「人對於一啲自己唔認識嘅嘢，或者超出自己想像同認知範圍嘅嘢，都會第一時間排斥。」

「但係其實我好想要朋友。」我睇唔到佢此刻係咩表情。

「只係我搵唔到，我只要一行近啲，人哋就會覺得我奇怪。」





「可能我唔識點樣自然而然咁同人交往吧？同得多靈界嘅人打交道，可能有啲怪異嘅距離感吧？」然後叮噹望返地下，隻手係空氣度摸緊啲嘢。

「你摸緊咩？」我有啲驚驚地。

「其實呢度有好多陰間嘅貓貓狗狗，唔係淨係得人類嘅靈體，呢度有好多隻流浪貓狗，頂唔順出面殘酷嘅環境，仲有啲係放唔低主人嘅貓仔同狗仔。」

原來佢摸緊嘅，係一個貓仔或狗仔。

「呢隻狗仔係流浪狗嚟，但佢放唔低一個細路仔。」

「唔係淨係得人先對現世有留戀，動物都會有。」叮噹講。

「你平時會嚟食飯陪佢哋？」我問道。





「係佢哋陪我。」

「我依家唔係再咁介意你哋話我Kam，我仲有我應該要做嘅嘢。」

叮噹係書包拎出一支香，然後擺近地下，點一點火，燒著咗支香，呢支香直頭係班貓貓狗狗嘅零食咁。

估唔到香都可以變做寵物嘅零食條，好嘢！

「我係咪好Kam？」佢突然間問。

嘩⋯⋯我屌！我真係唔識答⋯⋯

如果我係路人經過見到有個學生妹，點咗一支香，係地下揮舞，我一定係覺得Kam。

但我當知道咗一啲因由之後，我的確又唔覺喎！





「以前未真正識你嘅時候係，但識落咗之後唔係。」我遵循自己內心咁答。

「點樣先可以無咁Kam啊？」佢繼續問。