《我個老友從未來穿越返嚟，話我會愛上一個Kam女》: 010

死啦，我係咪應該同佢講，其實問呢啲問題仲kam呢？

不過算啦，佢係真心唔識嘅，理論上其實佢係勁啲，因為佢生活係兩個世界之間，要學曬兩個世界嘅禮儀都唔容易。

「其實無㗎喎，好多時自然啲，正常啲交流就得㗎喎。」

「但係點解無人想同我做朋友？因為佢哋唔知靈異世界？」雖然此刻佢仲有啲Kam Kam地嘅感覺，但係我無琴日咁抗拒。

「又無話一定要同所有人都做到朋友嘅，有啲人做唔到朋友咪由佢。」





「你依家有我呢個朋友啊嘛。」唔知點解，我順口就講咗呢句。

其實識落叮噹唔係咩壞人嚟嘅，佢有佢善良嘅一面，只不過佢有啲唔係好識同人相處，同埋唔出聲，講嘢又直，又無尾音姐。

叮噹聽到之後，愕然咁望向我，不可置信咁嘅表情。

「你係認真先好。」雖然就咁聽呢句好似冷冰冰咁，但其實佢係笑住講。

加多點，佢個人有啲純真？





忽然間，我背後飄過一陣寒風，刮過我背脊。

依家烈日當空，大熱天時，30幾度，仲要係公園入面，無可能有冷氣，何解有陣陰寒嘅風吹嚟？仲要得後背有感覺。

「喂！喂！」叮噹對住地下講。

然後佢皺起眉頭望住我，一臉嚴肅咁望住我，問：「食完未？」

「下？我啱啱食無幾耐⋯⋯做咩啊？」我扒緊啖飯，口齒不清咁講。





「走啦，要快啲！」佢捉起我隻手，佢隻手好冰冷，同時間我就咁俾佢扯起身。

「喂喂喂，我盒飯⋯⋯」我慌忙咁收拾好盒飯，跟住叮噹走。

「我哋去人多嘅地方。」佢急步咁拖住我離開。

「我未食完飯喎。」我抱怨住，同時又要跟上叮噹嘅腳步。

「要怪就怪你唔帶住我俾你個符囉。」佢轉個頭睥住我，表情微微嬲咁，比起今朝怒髮衝冠咁，已經有唔同咗。

「下？點解啊？」我不解。

「有嘢跟住你，但我未睇到係咩嚟，但係嗰隻嘢係遠處跟住你、觀察住你。」

「我唔知你惹到啲咩，但係頭先班流浪貓狗已經見到來者不善，係咁吠同喵喵叫。」





「咁點算啊？」俾佢講一講，我真係有啲慌。

「我頭先搵你就係想問你點算⋯⋯」

「依家去咗人多嘅地方先，人多陽氣會重啲。」叮噹已經鬆開咗我，時不時望向後面。

「姐係邊度？」我唔知佢想點。

「操場。」佢緩緩地道。

「陰間嘅鬼多數唔會係人多陽氣重嘅地方落手做啲咩，佢哋個磁場本身係咁，一定會等到你單獨一個空間，或者街上無乜人，等你同佢哋同頻之後，先再落手。」

「佢依家係跟緊過嚟？」我問。





「係，但你唔好向後望，自然啲，唔好俾佢發現到你已經知道佢嘅存在。」叮噹拉住我嘅手無鬆開過。

但呢度係學校附近，周邊都有好多同學仔望到，但佢真係可以無視旁人嘅眼光。

我就咁係眾目睽睽下，一路俾叮噹由校門口拉到去操場。

好多人食完飯之後喺操場打排球啊、打籃球。然後俾我見到唐師兄同女神打排球，玩得很是開心。

嚟到操場，叮噹先至放開我隻手，佢完全無意識到咁做有咩問題⋯⋯

但呢個係我⋯⋯第一次拖女仔隻手。

原來女仔嘅手係咁嫩滑，拖起上嚟原來咁舒服⋯⋯

屌我係度諗咩？？？





「佢依家仲係度望住我哋。」叮噹講道。