《我個老友從未來穿越返嚟，話我會愛上一個Kam女》: 011

「佢仲跟住我哋？」我左望右望。

「佢無跟啦，但係佢仲係學校出面睇住我哋。」

「姐係圍欄出面？」我望唔到，但確實感覺到有嘢存在。

「咁依家點算好啊？點解佢會跟住我㗎？我得罪咗佢？」我醒起搵叮噹嘅原因都係想佢幫我諗下計⋯⋯

「我都唔知啊，因為我唔知佢咩來頭，同埋背景，要知道之後，先可以對症下藥，同睇醫生一樣咋。」叮噹無奈咁講。





「咁佢會唔會一直跟住我？痴線⋯⋯本來我都唔信，依家仲要無啦啦俾嘢跟。」

「好大機會。」

「今日我同你返屋企啦。」叮噹突然又爆一句，佢成日講啲嘢我都唔知俾咩反應，更加唔知點接。

「下？你認真？」

「咁佢跟住你，你係咪搞得掂？」佢窒住我。





「咁⋯⋯咁又係搞唔掂嘅。」我認衰仔。

「謙！你食完飯啦？過嚟打波啦。」係操場打緊排球嘅唐師兄見到我返嚟，即刻諗住搵我一齊打。

「我未食完飯啊⋯⋯」我仲拎住手上面嘅飯盒，諗住食埋佢，「你咁快食完咩？」

「洗食幾耐啦，唔好食啦，快啲！叮噹你都嚟囉。」唐師兄好似同叮噹好fd咁，好熟絡咁叫佢。

明明佢之前都一齊覺得佢kam，同埋無幾句㗎嘛，依家仲叫人打排球。





我哋就咁俾唐師兄拉住去打排球，係佢哋嗰堆人入面，我哋公認嘅女神芷桐都係入面。

原來係咁⋯⋯唔怪得唐師兄咁興奮啦，原來係同女神打波，而芷桐佢真係好靚，就咁企係度都好似一幅畫咁，吸引住我哋望佢一眼又一眼。

我哋學校有個位置係打排球，基本上任何人接到都可以入去玩兩手。

「我⋯⋯唔啦。」叮噹講道。

「點解啊？」見到叮噹想拒絕，我下意識地問。

「我唔想，同埋我都唔識⋯⋯」

「放心啦，我哋會教你啦，同埋你頭先唔係話想識到朋友咩？你唔行出第一步係唔會做到朋友㗎喎。」

我見叮噹仲係好爭扎，今次換我拉起佢隻手，催促佢：「行啦，唔好諗啦！一齊玩會好開心㗎。」





就係咁，我以為會向好嘅方向發展，點知一次外向，換來長久嘅內向。

我同叮噹企係唐師兄同芷桐對面，互相猜下球。

然後我睇到芷桐望叮噹嘅眼神有啲唔對路，帶點不懷好意。

但我無擺係心，準備好姿勢，我係隔離教一教叮噹點樣擋，個姿勢點擺。

叮噹現學現賣，都有少少架勢堂，有板有眼。

誰不知下一秒，一個狠勁嘅殺球向住叮噹轟去。

排球直中叮噹手臂，當堂紅咗一撻。





我望去，係芷桐扣落去，力度都唔細，而且佢眼神凌厲，直勾勾咁瞪住叮噹。

「你無事啊嘛？」我錯愕咁望住呢件事發生。

「無⋯⋯」叮噹摸摸紅腫嘅手臂。

我有一刻衝動想對住芷桐對質，但唔想搞到咁僵。

同埋我原意係想叮噹體驗一下一班人一齊玩嘅樂趣，感受一下友情嘅快樂，但估唔到換嚟呢個結果。

「可唔可以細力少少？人哋第一次玩，新仔讓一讓啊？」我立即換個語氣，但都有啲倔。

「唔好意思，無心㗎喎～」芷桐不以為然，呢句唔好意思係帶骨的。

但佢似乎唔係針對我，因為佢嘅眼光由始至終都落係叮噹身上，我都好費解佢哋兩個有咩深仇大恨？





定還是又係靈異嘢？隻嘢上咗佢身？！