《我個老友從未來穿越返嚟，話我會愛上一個Kam女》: 012

我初頭以為係咪嗰隻嘢追到上嚟，但我見叮噹無反應，咁我諗應該唔係。

可能芷桐都唔樂見同叮噹玩，佢大可以走人，但佢無⋯⋯

不過全程黑口黑面，同埋處處針對住叮噹。

「呯！」芷桐扣殺落嚟，發出嘅巨響都咪話唔驚人。

我下意識企係叮噹前面擋咗一下，再彈俾唐師兄。唐師兄都好有默契咁輕手打返俾叮噹。





芷桐更加無表情，響咗上堂鐘之後，佢率先一個行開，唐師兄亦跟咗上去。

「你無事啊嘛？」我觀察叮噹隻手，見佢兩隻白哲嘅手臂連微絲血管都爆出嚟。

「無啊，估唔到原來打排球咁痛，但係幾好玩喎！」叮噹露出興奮嘅表情。

佢睇嚟好雀躍，唔知佢係完全感覺唔到芷桐對佢嘅敵意啊，定還是佢感覺到，只不過唔擺係心，或者強逼自己壓落嚟。

我哋行係唐師兄同芷桐後面，然後唔小心聽到佢哋嘅對話。





「做咩同嗰個神神化化嘅Kam友打波姐？佢又唔係識打。」芷桐將頭先嘅怨氣一下子喺唐師兄面前爆曬出嚟，亦都唔理我哋係咪喺後面。

「咁佢都無乜點影響我哋姐？」唐師兄笑笑口地幫叮噹講說話。

「你睇下佢手腳唔協調咁，打都打得唔順暢！」芷桐無視唐師兄嘅說話，繼續講道。

然後我同叮噹都放慢上樓梯嘅腳步。

我見到叮噹嘅表情有掩蓋唔住嘅傷心，證明頭先嘅事其實佢係知道。





我想講啲咩安慰佢，但係諗唔到講咩好。

佢依家就好似童話故事入面嘅醜小鴨咁，睇住前面嘅天鵝排斥自己。

喺上堂期間，我依家有意無意留意多咗叮噹，我周不時都留意緊佢有無唔開心。

放學嗰陣，佢真係行過嚟，講：「去你屋企吧。」

跟住唐師兄都好順理成章咁行過嚟，我哋日日都一齊放飯，佢見到叮噹都係度，一點都唔意外咁。

「又有污糟嘢啊？」唐師兄從容地同叮噹講。

「又？污糟嘢？」叮噹一臉黑人問號咁望住唐師兄。

頂！我依家都幾肯定唐師兄喺未來一定同叮噹幾fd⋯⋯





但係我好想知佢哋中間發生過咩事，會咁fd。

「哦，無⋯⋯琴日謙仔俾咗個護身符我，叫我保管好喎，話咩有事再搵我拎返。」唐師兄一下子爆曬我啲嘢出嚟，我封都封唔住佢把口。

「喂喂喂！」我已經阻止唔到。

「哦⋯⋯哦⋯⋯俾咗人添？」叮噹慢慢轉個頭嚟望住我，眼神唔方友善，彷彿想將今日嘅怒氣發曬落我度咁。

「咁你自己解決返囉！」佢賭氣轉身就想走。

「哎哎哎，我衰仔，所以我今日中午咪搵你say sorry囉！」我激動地澄清。

「呢啲嘢係要跟身㗎！唔跟身就無咗佢嘅作用。」





「你下次仲會唔會俾其他人啊？」叮噹問道，見佢都心軟落嚟。

「當然唔會啦痴線，呵？唐師兄都唔會收㗎啦，哈哈！」我推一推唐師兄。

「係啊，呢條戇鳩仔唔會㗎啦！」唐師兄滿意地笑，然後用勁撚淫邪嘅眼神望住我哋兩個。

就係咁，我哋三個就咁返去我屋企。