《我個老友從未來穿越返嚟，話我會愛上一個Kam女》: 013

一路上，唐師兄叫叮噹唔好將今日中午嘅事擺係心。

「佢個人係咁直接，有嗰句講嗰句，唔洗擺係心。」

「係咪我唔夠好啊？」叮噹將好多嘅不解都問出口，相信呢啲都係佢困擾咗好耐嘅問題。

係咪自己唔夠好？係咪自己好奇怪？係咪我問題？係咪我唔值得？

「當然唔係啦，你好善良啊⋯⋯」唐師兄給予肯定。





「芷桐都唔係啲壞人嚟，遲下你就會明㗎啦！相信我！」

「係咪因為我睇到陰間嘅鬼怪，你哋覺得好Kam，先無人願意同我做朋友啊？」叮噹就連咁柔弱嘅問題，問出嚟都好倔強，睇得出佢自尊心都好重。

我諗呢啲都係佢嘅自我保護。

「我諗，好多人下意識會避開自己認知範圍嘅嘢，如果我無遇到俾嘢纏住，我都會同之前一樣，極抗拒呢啲神神化化嘅嘢。」我認真講出自己心聲，呢個係我對叮噹改觀嘅時刻。

當自己接受到認知範圍嘅東西，先可以承認自己世界嘅狹小。





只不過叮噹依家係超前過我哋姐。

「係啊！所以問題其實唔係你度，係我哋姐，你只要等到佢哋明，就得㗎啦！」唐師兄附和我。

喺我哋連番攻擊同埋安慰底下，叮噹傷心嘅神情先平和落嚟。

我哋落車之後，叮噹講咗句：「佢依家跟緊過嚟。」

我哋下意識周圍望下。





「唔好周圍望！」叮噹喝道。

「佢會識自己跟過嚟，我呢個叮噹，就係用嚟招啲唔知自己做咩留係度，迷惘嘅魂魄，頭先佢都對呢個叮噹有反應。」叮噹講道。

「就算係街邊嘅人都有反應啦⋯⋯」我唔識死地講。

「屌你咩！」唐師兄即刻阻止我，但佢又俾我引到笑出聲，咁樣先抵死。

叮噹又再次睥住我，佢知道自己有啲柒。

其實我有啲enjoy佢睥住我嘅感覺，係有啲可愛，我係咪有啲M底？

「無無，靈界緊要啲，哈哈！」我盡量兜。

我哋去咗唐師兄屋企拎咗個護身符，我哋無入到唐師兄屋企，淨係係走廊度等，因為廢事招惹埋佢入去。





「你覺得嗰個係咩嚟㗎啦？」趁呢個空隙，我問叮噹。

「我估係你屋企新嚟嗰個人帶返嚟，佢係你邊個嚟㗎？」

「佢係我親生老豆嚟，我從來都無見過佢，佢琴日突然之間返咗嚟。」我都唔怕同叮噹講，唔知點解對佢就係有一種信任感。

「噓！」叮噹忽然神色凝重。

跟住落嚟，琴晚係房嘅嗰種寒意，係我背後出現⋯⋯

「係—我—後—面 ？」我用氣音加口形同叮噹講。

叮噹微微點頭，我哋心照不宣。





痴線⋯⋯我真係驚到仆街，個心瘋狂咁跳，我呼吸都唔敢。

嗰種寒唔係淨係得一種感覺，而係佢會移動。我係可以精準咁感覺到嗰股寒意由我背脊，慢慢移到去我頭頂，令到我成個人都動彈不得。
我唔知點算好，我只可以企係原地，等待叮噹嘅指示。

「你唔好郁住，佢頭先應該係想聽八卦？佢似乎係識你親生爸爸。」叮噹不慌不忙咁講。