《我個老友從未來穿越返嚟，話我會愛上一個Kam女》: 014

真係我老豆招惹返嚟？佢呢幾年做過啲咩？

一股由心底發出嘅恐懼感瞬間遍佈全身。因為佢做咩都唔出奇，我唔識佢，唔知佢為人係點，殺人放火？我點知我背後嘅嗰個東西係咪想搵我老豆報仇？

我開始相信叮噹，唔係每一個靈體都係有惡意，正如頭先公園嘅貓貓狗狗咁，唔見得佢哋會攻擊人。

所以亦都再次認證咗呢個世界沒有無緣無故嘅恨。

人有時比鬼更加邪惡，唔一定鬼係惡，正如警察都唔一定係正義嗰個，老師亦都唔一定啱曬。





所有世間嘅事物，都需要自己親身感受，先至係答案。

「佢依家停咗係度，無郁到。但我睇唔清佢嘅樣同個身體，淨係見到一舊黑影。」叮噹講到。

「我都感覺到佢慢慢向咗後？」我問叮噹。

「係啊，睇嚟佢對你都無乜敵意。」

「係呢⋯⋯點解你會睇得到呢啲嘢嘅？」我見唐師兄咁耐都仲未出嚟，就想問下呢個一路以嚟，我都不解嘅問題。





「呢個問題，唔係咁好答，有啲複雜。」叮噹思索一陣之後，講道。

「正確嚟講，經歷過生死之人，先可以打開第18層同第19層之間嘅門。」

「而我哋所講嘅鬼門關，其實係身處兩個世界之間嘅狹縫。」叮噹講得好是複雜，我更加唔明。

我再聽叮噹嘅一輪解釋，我先知原來個世界係咁樣組成？完全係顛覆咗我對呢個世界嘅認知，亦都好撚佩服叮噹嘅知識。

簡單嚟講，就係我哋所講嘅地獄、18層地獄真係存在，只係同我哋普遍理解嘅有啲唔同。





亦即係我哋現世所身處嘅世界，其實係第19層世界嚟；而係我哋現世之下嘅，就係所謂嘅「18層地獄」。只不過佢哋唔係世間流傳到咁恐怖嘅地獄，只係比我哋現世嘅居住環境、物質，更加惡劣嘅地方。

我哋現世嘅所有人，其實都經歷過第1層世界嘅洗禮，可能留係現世，可能上升一層，至於點樣可以爬上去，就要睇你達唔達到上一層世界嘅靈魂要求。至於個準則，都講唔準，好難再去考究。

而我哋所講嘅上天堂，其實就係再上一層，至於總共係有幾多層，根據靈魂狹縫入面嘅書籍記載，估計係有24層，最頂層就係一個無憂無慮嘅極樂世界。

所以坊間好多對於鬼神、神明、宗教等等都有唔同嘅說法，但都係指向同一個，就係極樂世界。

有時我哋靈魂嘅記憶會帶有下一層嘅記憶；甚至卡點，一直上唔到多一層，卡係同一層都係常有嘅事。即係成日講嘅輪迴。

而層於層之間，存在住一個靈魂狹縫，即是鬼門關。係呢個空間入面，靈魂會被拷問，會飄流係度，會決定你係要落一層，留係呢層定係上一層，都會係呢個空間度做曬。

作惡多端嘅，自然達唔到上一層嘅門檻，就會跌返落去，呢個都係保障越高層世界嘅順利運作。

而現世可以睇到靈魂狹縫嘅人，都需要經歷鬼門關嘅考驗，先睇得到。





就好似鋼之鍊金術師嘅真理之門一樣，當強行進行極限嘅人體鍊成，會被拉去真理之門。