《我個老友從未來穿越返嚟，話我會愛上一個Kam女》: 022

『真係咩？』女鬼開始有啲動搖，聲線都抖顫。

「我諗你呢一刻嘅想法，auntie都經歷過同爭扎過，佢已經行返出嚟，依家輪到你。」叮噹幫忙勸說。

叮噹掂住老媽嘅手背，呢一刻我唔明佢咁溫柔嘅力量係邊度嚟？明明係學校佢成日都受唔少委屈，仲要成日遇到靈魂狹縫入面嘅奇怪事，呢一份善良唔係個個都做得到。

俾著我，可能會同全世界反擊都唔出奇。

隨後叮噹拎出一支香同一個蘋果，點著支香之後，插係蘋果上面。





香煙緩緩飄開，隨住空氣散開，指出一個方向。

「你跟住支香飄散嘅方向離開，佢會指引你，會帶你上一層。當然，你要放低所有執念先可以跟隨到支香，如果做唔到，只會繼續留係呢個狹縫，或者再投胎留喺現世。」叮噹講完就係度等。

我哋腦海入面無再響起女鬼嘅聲音，空氣一片死寂，我哋都不約而同咁望住叮噹。

等咗好耐，叮噹終於開口講：「佢飄走咗啦。」

「所以佢可以上到一層啦？」我問道。





「嗯。」叮噹鬆咗口氣，個人都無曬力咁攤坐係地上。

呀媽扶佢去沙發度坐，然後我同唐師兄就慢慢反應過嚟，整理一下現場，亂到七彩，而我老豆仲瞓係地下不省人事。

「我以為佢仲會講啲咩添。」呀媽忽然地講，「佢真係放得低？」

「佢係度喊咗好耐，喊到攰之後，然後佢一直望住你，望咗好耐，最後釋懷咁笑了笑，就飄散咗。」叮噹憶述返頭先嘅事。

「如果佢真係無放低的話，係唔會跟得到隻香飄散開去⋯⋯我諗真係auntie你令到佢放低。」





「正所謂解鈴還需繫鈴人，佢同你之間即使大家無見過面，但係一直有個心結係入面，佢一路都將你視為假想敵。呢種痛苦無表露過出嚟，但係一直收埋喺心底，直至頭先先至消散。」

「咁老豆呢？」我直接問。

我已經唔介意俾叮噹知道我嘅難堪，依家Kam嘅唔係佢，而係我呢個家庭。

「我唔知佢心入面點諗，但我見最後嘅時刻都無望過你老豆，我諗其實佢有柔柔嘅時候都唔想生佢出嚟嗰陣，已經對佢死心，只不過到最後對佢係心有不甘。」

「唔好睇少靈體唔甘心嘅力量，睇少呢樣嘢，最後會食唔少苦頭㗎。」叮噹意味深長咁叮嚀著我。

我嘅餘光瞄到唐師兄，佢嘅表情凝重起上嚟，然後瘋狂地點頭，聽到叮噹最後嗰句之後，佢好似好認同。