《我個老友從未來穿越返嚟，話我會愛上一個Kam女》: 023

叮噹嘅引路香已經燒完，件事都看似告一段落，但當我再望望仲瞓係度不省人事嘅老豆，就知真正最難搞嘅並唔係鬼魂，而係在生嘅人。

因為我唔知點面對佢，同埋唔知同佢講啲咩好⋯⋯

對於佢所做嘅事，就算俾佢兜到，我都認同唔到佢嘅所作所為，無論佢當初有咩苦衷都好，佢都係拋底咗呀媽，係我嘅童年缺乏一個完整嘅家庭。

另一邊廂，呀媽同叮噹好好傾。

「唔該曬你啊同學仔，真係好彩有你係度，如果唔係都唔知點算，可能會係另一齣悲劇。」





「你係專登嚟幫手？」我呀媽收拾完現場之後，同叮噹講。

「嗯⋯⋯係啊，因為我見到呀謙佢俾嘢跟住，加上佢又好⋯⋯好困擾咁，就想幫一幫佢。」叮噹忽然地面紅起下嚟，可能俾人讚到怕醜。

同時，叮噹其實都一臉疲態。相信頭先都用咗佢唔少精神。

「咁以後都仲要你幫手睇住謙仔啦～哈哈！」呀媽笑到見牙唔見眼，對眼彎到勾月咁。

「我⋯⋯」叮噹對住呢啲場合似乎唔知點應對。





「知㗎啦Auntie，佢會睇住我哋㗎啦，你放心啦！」唐師兄衝出嚟幫手解圍，而佢隻手都好自然咁擺係叮噹個頭上面。

呢一下，我竟然覺得有啲唔舒服⋯⋯

雖然我知佢呢個係fd底嘅動作，同埋想打圓場，但都有啲介意？我唔敢肯定。

「如果有任何怪異嘅嘢，我可以幫到嘅都會幫。」叮噹對唐師兄嘅解圍不以為意，亦都稍稍避開唐師兄一隻大手。

「但下次會收費。」





叮噹下一句咪話唔驚人，真係忽然Kam你一下。

我呀媽最憎講起錢㗎啦，由細到大都係咁，我一問親佢拎錢就嘈到拆天，屌到我上天花板，我正想阻止老媽子唔好爆炸先，唔好屌人先⋯⋯

殊不知佢竟然係開口講：「咁梗係無問題啦！你呢啲都係辛苦錢嚟，要俾嘅要俾嘅。」

我老媽一反常態，平時視財如命嘅佢，竟然可以咁豪爽？我係咪出現幻覺？

「如果無咩事咁我走先啦。」叮噹唐突地講。

「哦～好啊，都晏啦，你哋要唔要留低食飯啊？」呀媽親切地問。

「唔洗啦，多謝，我屋企人煮咗我飯。」叮噹客氣地推辭咗。

「咁我都走先啦Auntie，下次我再上嚟食飯啊！」唐師兄都同叮噹一齊閃了。





兩隻靈體離開咗之後，間屋無再異常地凍，我見到我掛名嘅親生老豆仲咗留係，真係唔知點算好。佢就咁瞓係地下，一動不動。

我哋決定唔理佢，諗住等佢自然醒，而呢個時候呀媽唔放過呢啲時機。

「你同頭先個女仔點姐？」佢八卦地問。

「人哋叫叮噹。」我沒好氣地應佢。