《我個老友從未來穿越返嚟，話我會愛上一個Kam女》: 024

「人哋都幾好啊，你諗諗佢啊，你呀媽我好開明㗎，唔會要你讀書時咩不應談戀愛，哈哈。」然後自己係度自high，唔知做乜春。

「你唔好發神經啦，我同佢只不過係同學咋，呢排先叫做比較多嘢講咋！」我反佢白眼。

有時呢，唔知係咪其他人講得多，自己都會留意人哋多咗，之後就會不自覺地FF同佢一齊之後嘅畫面⋯⋯

之前有唐師兄忽然嘅預言，依家我老媽子又加多把口。

「你咁得閒，不如諗下呢個『親生老豆』醒返之後點算好過啦。」我轉移話題。





「係喎！唉⋯⋯」

「你都未同我講佢嘅嘢，佢無啦啦返嚟，然後又想關心我，做個好老豆咁。」

跟住呀媽就簡單講返個故仔，就係佢當初生意失敗，連結婚嘅嫁妝同埋求婚都賣曬，後生有過份嘅信心同埋過份嘅勇氣，覺得自己有一片天，夠膽搏，所以亦都容易出事。

好多人都唔會諗出事之後嘅部署，咁又係嘅，邊個會覺得自己掂嘅時候會諗自己衰㗎，意氣風發嘅時候一定FF到日後嘅生活好美好。

所以個反差會好大，一衰咗唔會點面對，就逃避。





聽呀媽嘅回憶，老豆嗰陣對呀媽都好好，就算生意失敗，都唔會發脾氣，對個屋企都好好。但係出面有啲咩，佢都唔會同呀媽講，出咗事之後呢個情況更加惡劣，開始越嚟越夜返屋企，會少講嘢，會自己鑽牛角尖。

呀媽想幫佢，但係都唔知可以點幫，因為打從一開始佢就已經落咗閘，將呀媽排係外面。一廂情願地認為出面嘅苦，佢一個人食就夠，而忽略屋企其實係佢避風港。

佢最後的確無拖累到屋企，無人嚟收數，上門搞事，自己搞好曬就消失咗。

「佢醒咗之後，你諗住點啊？」我問呀媽。

我唔識評論呢單嘢，尤其是發生係自己身上，有好多說不清嘅事。





「你呢？你點睇佢啊？」呀媽反問返我。

「我唔會認佢囉，咁多年你受嘅苦我都見到曬，而佢一早有第二個，你呢？你都無搵第二個⋯⋯你係自己一個人，係一個人湊大我！」我越諗就越嬲，越講就越激動。

「當初就咁走咗去，依家做咩又走返嚟姐，走咗去就唔好返嚟啦！」我大聲咁講。

「Sorry⋯⋯」瞓係度嗰個男人終於蘇醒。