《我個老友從未來穿越返嚟，話我會愛上一個Kam女》: 025

對於有把陌生嘅聲係我身後響起，嚇撚死我！

「係我唔好，如果我後生有勇氣面對難題，你哋都唔洗搞成咁。」老豆現時已經坐起身，望住我哋。

「算啦，你講咩都無用。」回過神來之後，同一番說話我都照咁樣講。

「你依家對唔住嘅唔只我哋，仲有另一個家庭。」

講真，曾經我係有一刻幻想過老豆會唔會突然之間返嚟。其實細個係無好似啲劇咁樣，會有同學仔笑你無老豆，或者你成日見到隔離屋企有老豆接送，然後你會提子之類，其實無。





但係會突然有啲瞬間，你會諗起呢個人，然後你會想佢係你隔離。如果佢係度，會點呢？呀媽會開心啲啦，會幻想佢好似我們這一家個花老爺咁，得佢先治到老媽子啦，會得閒爆幾句經典嘅說話啦。

你話我係咪憎佢？我又覺得唔係，我會覺得失望多啲⋯⋯

同我想像中老豆嘅角色同埋印象都唔啱，再加上聽完個來龍去脈之後，更加失望到貼地。

「你哋俾次機會我試下好無？以前我唔識點做人爸爸，我依家慢慢學？好無？」老豆佢懇求我哋，語氣好誠懇，但好Kam。

佢唔明個點係邊。





「唔要，我已經唔需要。」我斬釘截鐵咁講。

我望向呀媽，睇下佢咩反應。

呀媽佢毫無表情，但係佢行埋嚟，企喺我後面，雙手搭係我膊頭上面。

呢一刻，我好是感動。我知背後有咩人，而佢係我最強嘅後盾，唔洗講咁多嘢，淨係一下已經心照不宣。

「我知自己衰邊，所以我先想改同埋做好啲，我都知我依家好厚顏無恥⋯⋯」





有一刻我覺得佢應該要俾個女鬼一直跟住。

「只不過我如果連呢個改過嘅機會都唔試下爭取，我會唔甘心，所以我點都要試下返嚟。」

「失去咗嘅人，我做唔到啲咩去改變，但仲在生嘅人我仲有機會。」佢講得好是真心，佢好似真係知自己衰邊。

但係有啲事唔係就咁話自己會改就可以算，犯咗法都唔係就咁話自己願意改過就會無罪釋放，都仍然需要承受後果。

更何況佢背負住兩條人命，雖然法律上佢係無事，但靈魂自有佢嘅一套。

「你走啦，唔好打擾我哋生活啦，如果你真係想改，就好好對下一個啦。」我冷冷地講。

「都係唔好，唔好有下一個，我唔想再有人受傷，你自己算啦，唔好累人。」我補多刀。

講完我就轉身打算行返入房。





「媽，我好攰，你幫我送呢個男人出去啦，我想入房抖抖⋯⋯」

我知呀媽應該都有啲嘢想同佢講，所以我都留返個場俾佢，等佢處理吧。

由始至終，我都無嗌過嗰個男人一聲「老豆」。