《我個老友從未來穿越返嚟，話我會愛上一個Kam女》: 026

「呯」一聲，關上門之後，我成個人攰到就咁攤係張床度。

好似抽走曬所有能量，可以話係昏迷咗。

當我醒返，已經係半夜凌晨三四點。我頭暈腦脹咁行出廳，廳出面漆黑一片，我靜靜咁開家母房門，佢係入面熟睡緊，而「嗰個男人」自然係閃咗。

自然經過寒冷嘅屋企之後，唔知點解依家覺得好鬼熱，唔知係咪我錯覺。

然後我瞓低之後，先意識到自己應該係發燒。





唔怪我頭先個人wing下wing下啦，仲要依家覺得渾身發熱，呼吸嘅氣都好重，唔知今日發生嘅嘢關唔關事。

眼皮越嚟越重，又沉沉咁瞓去。

當然第二日我都係無力氣返學，迷迷糊糊間，我見呀媽幫我處理好曬啲嘢，打去學校請假啊，準備好啲水係我床邊之類，搞掂好再返工。

去到中午，我發現自己餓醒，係餓到仆街，諗諗下我琴日係連夜晚都無食就瞓咗。

出到廳，就見到呀媽準備好一個保溫壺，入面裝住仲熱嘅粥，成日係呢啲時候就體驗到呀媽嘅好。





我打開手機，收到唐師兄嘅wtsapp，原來佢都發咗燒，然後叮噹都一樣發燒。

我「下」咗出聲，我哋三個同一時間不約而同都病埋？

去到夜晚，我個人都退咗燒，無今朝起身咁辛苦，於是我都去唐師兄屋企睇下佢死得未。

唐姨姨仲話佢未退燒，叫我入去睇下佢。

入去佢間房，見佢臉色蒼白，印象中我由細到大都未見過佢病得咁嚴重，佢本身個人都好身壯力健，所以我都係第一次見佢咁虛弱。





「點啊，死得未啊？」我挖苦地問道。

「你收⋯收皮啦，咳咳⋯⋯你咪又一樣病咗，但你好返啦？」佢有氣無力咁坐起身。

「夜晚好返少少啦，朝早嗰陣仲好似你咁。」我苦笑。

「係呢，你老豆呢？」唐師兄醒起，就問起上嚟。

我有啲唔係好知點答，組織一下就答：「你哋走咗之後，佢無耐就醒咗，佢不停咁想我哋俾多次機會佢，但我依然覺得唔可以就咁無後果，即使佢真係有想改過嘅心都好。」

我坐係唐師兄個電競椅上面，望住個天花板，係度打轉。