《我個老友從未來穿越返嚟，話我會愛上一個Kam女》: 027

「咁係嘅，始終佢仲揹住兩條人命喎⋯⋯」

「係呢，我琴日都想問你。」我醒起一樣幾重要嘅嘢琴日無問到唐師兄。

「其實琴日發生嘅嘢，係以前無發生過嘅？你未來係無發生到？」

「你俾少少時間我組織一下點同你解釋先。」輪到唐師兄要組織一下。

「我估你應該唔難明，其實當我同你講你會鍾意上叮噹嘅時候，你已經俾我影響咗。」





「之後嘅事我已經控制唔到，甚至一早已經出現咗同以前唔同嘅版本。記唔記得嗰日食飯，你買完飯之後去搵叮噹，喺以前嘅版本，係你會同我一齊返學校食飯，然後同女神一齊打排球。」

「不過無咗叮噹插手，你屋企嘅衰運的確係後面接踵而來。」唐師兄回憶返往事，並且有氣無力咁講。

「例如有啲咩呢？」我不禁好奇。

「我印象記得⋯⋯你老豆返咗嚟之後，嗰排你成日係咁病，然後呀姨都係，無幾耐係仲連工都無埋。」

「下⋯⋯姐係其實隻女鬼係一直係我屋企⋯⋯」我喃喃自語。





「經歷完今次之後，我先證實到應該係呢回事。」我同唐師兄係度拼湊返個故事。

「如果係咁，咁我之後係點同叮噹一齊？」我又好奇其他嘢，繼續追問落去。

人類就係會咁八卦，知道少少嘢就會去知埋落去。

「嗱，呢個我就唔講得啦，你睇下我淨係話你會鍾意上叮噹啊，個故事發展都已經變化到咁大，如果我咩都講曬出嚟，我唔知會變成點啊！」

唐師兄講嘅都啱，其實佢無干涉啲咩，但自從佢講完未來嘅事之後，我的確無意間留意多啲叮噹，然後一步步演變到咁。





「咁都係嘅⋯⋯至少往好嘅方面睇，我哋提前化解咗場危機。」我有啲感概。

「咁你真係要多謝叮噹啦，雖然佢有啲位係kam kam地，但佢的確係好人嚟。」

「咁你同芷桐呢？」我知佢一直都係鍾意呢個女神。

話鋒一轉，殺佢一個措手不及。

「真係估你唔到會呢個時候咁樣問，哈哈。」佢苦笑。

「我以前一直都無勇氣踏出嗰一步，我希望今次返嚟，可以填補返。」