《我個老友從未來穿越返嚟，話我會愛上一個Kam女》: 028

「雖然我哋以前都一齊鍾意女神，但我覺得之後你哋嘅故事點都係多過我，我一開始就比較膚淺啲，就係貪佢靚，甚至談唔上係鍾意？」

「真係好細佬仔嘅感情，而你係一啲都唔兒戲。」我同唐師兄坦白自己嘅心聲。

「你依家都已經鍾意埋叮噹添啦。」唐師兄忽然爆出呢一句。

「下？邊有啊？」我突然唔知點接好。

「哈哈哈，你自己點會知啊，但隔離有眼嘅人係會睇得㗎嘛。」唐師兄一講到呢啲題目，就好興奮，連病都好返咁濟。





「真係咩？你真係睇得出？點解呢？」我又真係唔係好察覺⋯⋯所以更加想知原因，會唔會有啲我係不自覺，無留意到啲位？

「你覺唔覺自己呢排成日都好留意佢先？有時你第一時間就會留意咗佢先。」佢用一個十分淫邪嘅樣望住我，呢個樣真係想打柒佢。

「有咩？幾時啊？」我有少少心虛。

「琴日女鬼發難嘅時候，你係第一時間望向佢㗎，你唔係望住呀媽，唔係望住我，係望住叮噹。」唐師兄佢唔係用責怪嘅語氣，而係取笑緊。

「係⋯⋯係咩？但⋯⋯我唔係唔著緊你喎！」





「同埋佢咁俾心機想幫我哋姐，咁佢都辛苦㗎嘛。」我想澄清。

「哦⋯⋯係啊？」唐師兄已經笑起上嚟，我覺得有啲不妙，佢一定有啲把柄係手！！！

「咁今日你知道我同叮噹都發燒，點解你第一時間就問佢有無事先呢？」

然後佢就搵whatsapp紀錄，碌到今日嘅對話，再拎住俾我睇，係我面前揮舞。

「咁我呢？又唔見你問我有無事喎！」儘管係講笑，但我都聽得出佢都有啲心理唔平衡㗎啦。





我連忙解釋：「咁我依家咪嚟睇你囉，我都唔係第一時間搵佢啦係咪？」

「屌，你咪兜啦，越兜越gay！」佢無我咁好氣。

「我唔係介意你無問我先啊，我係想你承認下呢啲細節咋，當你之後諗返，可能好早以前已經心動都唔出奇。」

「唔好一路覺得唔係，唔係呢，唔係鍾意人呢，到最後真係覺得自己鍾意人嘅時候，已經拖得太耐，或者人哋行得太遠啦。」

「然後又要再曬更多力氣去追趕返人，咪傻仔囉！」

唐師兄係咪想講啲咩訊息？就正正因為唔係直接講，所以我先係度猜疑。

與此同時，佢講得幾啱，唔知點解我第一下係想否認同叮噹之間嘅事。