《我個老友從未來穿越返嚟，話我會愛上一個Kam女》: 029

我都係度諗，我係咪應該要坦承啲？大膽啲？但我之前真係察覺唔到啲咩喎。

唯一自己有意識察覺嘅，就係唐師兄摸叮噹嘅時候，心入面有點不是味兒。

「咁你依家有勇氣追芷桐啦？」我問道。

「又想借啲意扯落我度，唔同你講啦！俾我休息啦。」唐師兄無我咁好氣，趕我走。

我笑笑口咁去到門口，的確都唔想騷擾個病人咁耐。但去到門口邊，我忽然又醒起一樣嘢，於是轉身問道：「咁你知唔知點解芷桐咁討厭叮噹嘅？」
「你真係呢⋯⋯咳咳——」唐師兄一臉病樣，啱啱瞓低又坐返起身。





「呢個我大概知。」我以為佢會唔知，條友又收收埋埋唔講。

我即刻鬆返放係門柄上嘅手，坐返唐師兄嘅電競椅上面，豎起個耳仔聽。

「點呢點呢？」

「你咁想知做咩姐？」

「咁你唔覺得叮噹好無辜咩？要咁樣俾人討厭法喎。」我好自然咁講道。





然後唐師兄好嚴肅咁望住我，佢臉色仲要好蒼白，有啲恐怖，然後講：「咁其實你之前都一樣覺得叮噹Kam㗎喎，一樣都唔鍾意佢㗎喎，記唔記得當初同你講話鍾意佢嘅時候，你好大反應話自己點會鍾意呢個Kam友㗎喎！」

我有啲無言以對，因為都講得啱，如果唔親自接觸佢，嘗試走入佢嘅世界，你係理解唔到佢點諗，更加理解唔到佢嘅善良。

你只會停留係，對佢嘅表面指控，同埋理解自己對他人嘅無知。

「所以我依家唔會隨便批判一個人，咁我唔知芷桐同叮噹係咪仲有啲我唔知嘅過節嘛。」

唐師兄沉默咗一樣，再開口講：「我後尾先了解到芷桐屋企人好迷信，所以佢對叮噹呢啲信神信佛嘅行為係極度反感。」





「嗱！你唔好爆響口啊，扮唔知住先啊。」佢補刀。

「知啦。」呢啲時候一定係咁答，唔通答我遲啲唔知幾時會無啦啦爆響口㗎咁樣啊？

「原來係咁，但咁樣叮噹都係好無辜⋯⋯其實佢都無錯，只不過係芷桐嘅⋯⋯偏見？」

「我哋都做唔到啲咩，各自有各自嘅原因啦，要等佢哋自己化解啦，仲要唔一定會有化解呢個機會添。」

「你唔好諗住幫曬叮噹添啊！陣間激嬲埋芷桐你就死！」唐師兄囑咐我。

「點解啊？」我疑惑。

「因為我會搵你算帳囉！激嬲我女神！」唐師兄扮曬唔客氣咁。