《我個老友從未來穿越返嚟，話我會愛上一個Kam女》: 030

打發時完唐師兄之後，唔同佢鳩落去，我又返屋企繼續瞓，第二日返學，叮噹都無返，唐師兄都係。

第三日唐師兄病好返學了，但係叮噹都仲未返。

今次搞到我都有啲擔心，唔知佢仲會唔會有啲靈異事，同埋我知關心佢嘅人唔多。

因為班上嘅同學無人關心叮噹咩事無返學，但我同唐師兄都有俾人問起，甚至有啲人覺得呢幾日無聽到「叮噹」聲，好安心。

可想而知叮噹嘅Kam已經深入民心。





我今次無同唐師兄講，放咗學之後，我就自己閃咗，去咗叮噹個鋪頭度，諗住睇下佢咩事。

但係呢，我好緊張！我應該用咩籍口搵佢？

最後，我淨係諗到動漫啲屎橋，同埋無出面徘徊咗一排先儲夠勇氣行過去。

「想買咩啊？」一把慈祥嘅聲音喺鋪頭入面傳出嚟。

「你好啊，我想搵蘇雅婷啊，佢係咪度啊？」我小心翼翼咁問。





「你搵小婷？」老奶奶蹣跚咁行出嚟。

我見到老奶奶嘅時候有啲嚇親，因為佢雙眼係無眼珠，得眼白。姐係其實老奶奶係睇唔到嘢。

「係啊。」我應道。

「你係邊位搵佢啊？」佢好溫柔咁問。

「我係佢嗰班嘅班長，我係嚟俾功課佢嘅。」





以上我講嘅嘢有一半係真，而班長呢個橋，係我抄啲動漫諗返嚟⋯⋯

「小婷呢排病得好犀利，佢依家係入面休息緊，班長你入去搵佢啦。」老奶奶扶住個椅凳，然後坐低。

「好。」然後我就穿過啲紙牌公仔啊，陰司紙同埋元寶蠟燭，行到深處。

鋪頭最入面係一條樓梯，通到上去，依家香港店鋪連住屋嘅單位都買少見少。

係我準備行上去嘅時候，老奶奶忽然講咗一句：「之前跟住你嗰個已經走咗啦嘛？」

雖然老奶奶嘅語氣好和善，但係聽到我背脊發寒。