《我個老友從未來穿越返嚟，話我會愛上一個Kam女》: 031

「嗯，係啊，已經解決咗啦，要多謝叮⋯⋯要多謝呀婷。」我有啲尷尬咁講。

同時我都奇怪，老奶奶知唔奇怪，佢睇得出已經無再跟住先奇怪。

「好，人無事就好，你哋無去到『異地』嘛？」老奶奶又講啲奇奇怪怪嘅說話。

因為我唔知佢講乜，所以就求其應咗句：「無啊，邊有！」

見佢無反應就行上去，上到去之後，有一條長長嘅走廊，入面有好幾間房，我一時之間唔知叮噹係邊間房。





「叮噹？」我輕聲叫道。

無人應我，我唔知佢係咪唔知叮噹呢個花名，所以我直接嗌佢全名。

「蘇雅婷？」我加大聲量。

「邊個？」一把虛弱同帶點驚恐嘅聲音傳出嚟。

「我係呀謙啊，我嚟拎功課俾你。」我聽到把聲係最入面間房度傳入嚟。





呢度嘅溫度有啲低，同埋都幾暗。我經常一間無門嘅房，我望到入面嘅嘢，有啲嚇親我。

呢間房入面有一個裝住關二哥嘅櫃，隔離係啲道具櫃嚟，仲有啲拜神用嘅元寶蠟燭同香，呢啲都好正常。

最詭異嘅係地下度陣。

一個似乎用血畫出嚟嘅陣，成個鋼鍊咁嘅鍊成陣係度，我唔想係度見到有人嗌我「大哥哥」。

我唔知係有咩作用，但老奶奶唔怕我發現呢個㗎⋯⋯？定呢個其實無乜咁大不了？





「你係最入面啊？」我瞄咗一眼之後，就沿住聲音行入去。

「嗯。」佢好似隻小貓咁應我。

「我入嚟啦。」我敲敲門後就入咗去。

我見到叮噹滿臉憔悴咁準備落床，佢著住普通嘅大T恤，見到我開咗門入嚟，就又攤返落床。

我俾佢呢行為搞到笑，有啲kam kam地，但好隨心。

「你好似就死咁喎。」

「嘖！」叮噹反我白眼，續道：「都唔知係因為幫邊個先搞到咁，依家仲要講風涼話？」

佢拎住張被包住自己，然後成個人縮埋一舊。