《我個老友從未來穿越返嚟，話我會愛上一個Kam女》: 032

我環觀叮噹間房，佢間房好有少女心，同佢嘅形象好唔似。佢間房係粉紅色系，雖然牆身無油粉紅色油漆，但係啲公仔啊佈置幾乎全部都係粉紅色。

重點係原來佢鍾意隻無嘴貓，姐係Hello Kitty。

經歷完頭先嗰間有啲陰森恐怖嘅房之後，再入到呢間房，我有少少思覺失調。

「你仲未好返？」我關心叮噹。

「嗯⋯⋯」





「係咪會消耗好多精神力㗎？嗰次真係唔該曬你，如果唔係我同呀媽就奶嘢。」我直接坐係地下算。

叮噹轉個身嚟，望住我。

「多數都係啲靈體會多謝我，你係第一個活人講多謝嘅人。」

「下？真係㗎？會咩？」

「嗯，所以我唔知點覆你，但係幾開心嘅。」佢用張被遮一遮佢半邊臉，我估佢係有啲怕醜啦，但係佢咁樣反倒覺得佢有啲可愛。





「係呢，後尾你呀爸點啊？」佢問道。

於是我將嗰日發生嘅事再複述多次俾佢聽，佢好認真咁聽曬。

「唔好咁輕易原諒佢啊，要佢承受下先！」

「當然啦，我仲未認佢㗎，佢咁樣點做人老豆？」

「係呢，你頭先上嚟之前係咪見過我婆婆啊？」叮噹問道。





「係啊，佢仲講咗啲奇奇怪怪嘅嘢⋯⋯」我諗起嗰句嘢，同時我都有啲好奇叮噹嘅身世，佢係一直以嚟都同老奶奶相依為命？

「你點同佢講㗎？佢又俾你上嚟嘅？」佢無視我，有啲緊張咁問。

「我講話自己係班長，然後嚟拎功課俾你，啊⋯⋯又真係要俾功課你哈哈！」我起身拎埋啲功課出嚟先，好驚陣間會唔記得咗。

「咁佢講咗咩奇怪嘢？」叮噹接住問。

「佢問我上次跟住我嗰個係咪走咗，同埋問我有無去過『異地』？之類。」

「係咩意思啊？」我繼續追問。

「婆婆對眼雖然睇唔到現實嘅嘢，但佢睇得到靈魂狹縫嘅嘢。」