《我個老友從未來穿越返嚟，話我會愛上一個Kam女》: 033

「下？咁勁㗎？」我真係睇少呀婆啦⋯⋯

「上次你係對面坐住，有舊嘢一直跟住你，都係婆婆睇到再同我講。」叮噹道出真相。

「咁『異地』呢？異地又係咩嚟？同埋你係一直都同婆婆生活啊？」我坐係床邊，一路慢慢嘗試行入佢嘅生活。

感覺我哋之間嘅距離又再拉近咗。

「異地姐係靈魂狹縫，其實係有方法去第18.5層，你咁樣理解應該容易啲。」叮噹吃力地坐起身。





「但係絕對唔建議，越留得耐，你付出嘅代價就越多，而你唔知返嚟嗰陣，個代價係啲咩。」

「既然唔知個代價係咩，姐係代表無論咩代價都好，你都係要食。」

「我哋家族一直流傳住一個故事，我哋祖先喺一個大戶人家度做管家，而主人家過世之後，透過一啲特殊方式返嚟搵返佢哋，希望我哋祖先可以照顧佢哋仲係世間嘅仔女，而呢個大戶人家都唔係啲咩好人，佢哋得知自己即將要落多層，去到呢啲位，佢希望自己嘅仔女係可以上到去，就囑咐我哋祖先可以照顧佢哋，唔好俾啲仔女好似佢哋咁要落一層。」

「而佢哋返嚟嘅方式最後俾我哋祖先知道咗，一直用祖傳嘅方式留到依家。」

我直覺話我知，個方式應該係同頭先睇到個陣有關，但我唔敢問。





「咁你哋係有用過？如果唔係點知道會有代價？」我好奇地問，但點知呢個一問，就觸動到佢嘅神經。

叮噹無啦啦喊起上嚟，由抽泣幾下，變成大哭起上嚟。

我慌了。

即刻係間房度搵紙巾，然後遞俾佢，但都係止唔到佢嘅淚水。

「做咩事啊？做咩無啦啦喊成咁？」我心頭一軟，係咪我講錯嘢？





由盤古開初，只要女人一喊，男人就無曬辦法。

叮噹猛咁搖頭，很用力，但無停止喊。

我忐忑咁伸出手，最後都係決定輕撫佢背脊，掃住佢個背，希望可以安撫到佢忽然間不安嘅情緒。

我唔知咁樣做啱唔啱，我唔係好多同女仔接觸嘅經驗，就算成日話想溝女神都係口講多過行動，但我當下真係唔想見到叮噹唔開心。

一陣子後，叮噹無喊得咁勁嘅時候，我就收手，但佢仍然抽泣緊。

「Sorry…因為頭先你咁樣一問，我諗起我嗲地媽咪，而我呢兩日瞓緊嘅時候，我又再次夢見佢哋⋯⋯」

「我Sorry就真⋯⋯我無諗過會觸動到⋯⋯」我有啲口窒窒咁講。

「唔關你事，我都唔怕俾你知，而且你都係第一個我可以分享呢啲事嘅人。」叮噹臉上仲有淚痕。





「我呀爸呀媽係交通意外過咗世，唔知你記唔記得有單新聞係巴士翻側衝咗落山嘅新聞，我呀爸呀媽就係入面。」叮噹回憶自己嘅身世。

我哋兩個嘅身世都一樣坎坷，坦白講，我有時都好羨慕唐師兄嘅屋企，佢哋屋企嗰種氛圍同溫暖，都係我所嚮往嘅嘢。

「記得。」

叮噹慢慢回憶佢細細個嘅故事。