《我個老友從未來穿越返嚟，話我會愛上一個Kam女》: 034

【叮噹篇】

「小婷，你感唔感覺到啲嘢啊？」婆婆捉實我隻手，緊張咁問道。

「無啊。」我望住一片黑暗嘅森林，得路上嘅街燈照耀著。

「好。」婆婆繼續拉住我，係馬路上面徘徊。

行咗一陣，婆婆又再問：「有無一啲熟悉嘅感覺？」





「嗯⋯⋯都係無。」印象中嗰陣我只有小學一二年班，我知道大概發生緊咩事。

「係咪搵緊嗲地媽咪？」我情緒又有啲上嚟。

因為曾經我都有個幾好嘅屋企，唔敢講話好完美，但屋企人都對我好好，我想上咩興趣班，佢哋都會諗方法俾我上。

「係啊，但呢度好似唔見佢哋，照道理應該可以係度見到佢哋⋯⋯」婆婆苦惱地說。

我哋連續嚟搵咗三日，都無果。但我唔明點解咁肯定可以喺現場見返嗲地媽咪，細細個嘅我唔明白呢個世界嘅運作。





我用咗好長嘅時候，先至適應呢個事實，同時我越嚟越少講嘢，開始唔係好識表達自己。

婆婆呢段時間諗嚟諗去都諗唔明點解會唔見我嗲地媽咪，越諗越奇怪，越諗越不安。

「小婷，婆婆決定要去異地搵你嗲地媽咪，呢個動作好危險，你可唔可以幫婆婆啊？」

婆婆係我起身嘅時候，坐係我床邊，溫柔咁同我講。

睡眼惺忪嘅我，未搞清楚發生緊咩事，支支吾吾咁答佢：「好！」





「係咪嗲地媽咪會返嚟啊？」天真嘅我問婆婆。

婆婆笑了笑，摸住我個頭，咬一咬下唇，然後都係殘酷咁同我講：「佢哋返唔到嚟，但可以再見佢哋一面。」

「可以再見到佢哋？！」我好想好想再見佢哋啊⋯⋯

唔知係咪起身氣關係，不停地扭計。

「我想見嗲地媽咪啊！」

「小婷，今次只會得婆婆入去搵你嗲地媽咪，我⋯⋯我帶唔到你入去。」婆婆用佢精靈嘅雙眼望住我講，眼神裡透露住無限嘅柔情。

面對無理取鬧嘅我，不停扭計嘅我，都仍然咁有耐性。

「點解啊！點解唔可以帶我去見啊！」呢幾日不捨同埋傷心嘅思緒喺呢一刻徹底爆發。





「嗚——嗚嗚——我⋯⋯我好掛住佢哋啊！」我爆喊咗出嚟，亦都將所有嘅情緒爆發落婆婆身上。