《我個老友從未來穿越返嚟，話我會愛上一個Kam女》: 036

「好！我準備好啦。」我深呼吸一下，同自己講唔好驚，總之入到去就係搵到嗲地媽咪為止。

「你真係準備好？陣間你自己一個嘅時候，任何風吹草動你都唔可以郁㗎喎。」婆婆疑惑咁望住我。

「自己一個？唔郁？」我天真咁問。

「你以為同婆婆入去啊？」婆婆大驚失色。

「唔會啊！婆婆唔會俾你同我一齊去咁危險嘅地方！」佢既激動，又充滿住關心嘅語氣同我講。





除咗嗲地媽咪，婆婆就係呢個世界上最錫我嘅人。打從細個開始，佢已經成日會買零食同好野食俾我，雖然俾我嘅玩具都係啲紙紮玩具⋯⋯

「入親去都要付出代價，我唔想你咁細個就付出代價，影響好大㗎！」

「所以你乖乖留係度，好嗎？」

「不如咁，婆婆同你玩個遊戲啊？」話鋒一轉，婆婆活潑上嚟。

「你係度做『守燈人』，陣間你守住係度，任何嘅風吹草動，你都唔好郁，聽到任何聲音都唔好開眼，直至我拍你三下，然後同你講：我返嚟啦。」





「呢個遊戲容唔容易玩啊？」婆婆苦笑。

個遊戲易玩啊，不過要賭上命仔就地獄級難度。

「你幾時會返嚟啊？」我有點抖顫地講，因為我唔知如果我失去埋婆婆的話，我會點算⋯⋯

我一定生存唔到落去。

「呢條紅線會連係我哋兩個身度，如果條線有咩郁動，你就吹響呢支笛，一直吹吹吹，吹到我返嚟為止。」





婆婆俾咗呢支「引魂笛」我，佢嘅作用就係俾潛入嘅靈魂聽到聲音嘅來源，識得返嚟。

但我後來先知，原來呢支引魂笛係仲有可能引到其他魂嘅，所以婆婆先叫我唔好亂咁吹，真係危急嘅時候先吹。

婆婆交代好之後，就準備緊自己嘅嘢，而我係緊張到手都震埋，完全冷靜唔到。

婆婆要斷埋五感先可以進行18.5層，佢用浸過柳樹水嘅黑布蒙住雙眼，耳朵塞入硃砂棉花。

因為活人嘅視線同聽覺帶有陽氣，如果唔封閉五感，一入狹縫就會被億萬靈體瞬間發現。

平時拜神驅鬼係「請鬼上嚟」或者「送鬼走」，但我哋祖傳呢套係「活人逆行偷渡」——將活人嘅靈魂硬生生推入靈魂狹縫，再完好無缺咁拉返出嚟。

因為呢種極端嘅「偷渡術」極度危險，只要步驟錯少少，婆婆就會直接腦死，變成植物人。