《我個老友從未來穿越返嚟，話我會愛上一個Kam女》: 038

我慌到癲咗，不停咁嗌婆婆，然後不停喊，當下好驚，好驚⋯⋯

好驚我連最後一個親人都無埋，所以真係承受唔住。

我唔知喊咗幾耐，個空間好似流動唔到咁，無風⋯⋯一片死寂。

忽然間，我感覺到條紅繩係空中揮動起上嚟。我即刻拎起支「引魂笛」不停吹。

「咇——咇咇——咇咇咇咇——咇——」我亂吹一通，毫無節奏可言。





「呼！」

「咳咳咳！！」

婆婆有返呼吸，我好想張開雙眼，但諗起婆婆之前講話要等佢講咗佢返嚟啦，先好睜開對眼。

細細個嘅我，好乖咁遵守呢一啲規矩，即使我心入面充滿住激動，我好想好想見到婆婆平安無事咁返嚟，但我都強忍落嚟。

「小婷小婷。」婆婆嗌我。





「婆婆？」

「我返嚟啦！」我終於聽到呢一句，我張開雙眼之後，嗰一幕我真係衝擊到我，即場繼續爆喊。

「你係邊啊小婷？」婆婆有點慌張地問。

我見到婆婆雙眼只有得返眼白，無咗對眼珠。

我當下只係識得喊，婆婆循住我哭得梨花帶雨嘅聲線爬過嚟。





婆婆見我喊得咁大聲，攬住我安慰我道：「我依家知道個代價係咩，但我接受，如果可以換嚟我同你都見到佢哋一面，然後佢哋都安心上到多一層美好嘅世界，我呢對眼就值得了。」

「反正我呢世人都見過唔少人同事，仲有好多美好嘅風景，晚年睇唔睇得到嘢，都無乜所謂啦。」婆婆用佢粗糙但溫柔嘅手摸住我嘅頭髮，一路順落去。

「咁⋯咁你⋯⋯你之後咪睇唔到我囉？」我傷心咁問。

我仲想婆婆可以睇到我好多嘢，睇到我大個啦，睇到我結婚啦⋯⋯我仲想佢見證我更加多。

「之後就係小婷你，代表我對眼，去見證呢個世界啦。將我嘅份量帶埋出去，你唔好唔記得有婆婆睇住你啊。」

細個嘅我只顧住喊，我長大嘅過程中時不時回想起呢一幕，就更加覺得婆婆好犀利。因為當下嘅佢明明先係失去雙目，備受打擊嗰個，反而安慰返我轉頭，如果係我，可能已經崩潰到拆晒天。