《我個老友從未來穿越返嚟，話我會愛上一個Kam女》: 039

「咁最後搵到嗲地媽咪？」我問道。

「嗯，我搵到佢哋。」婆婆佢眼神有啲閃縮。

「佢哋點啊？」

「小婷，佢哋會想避我哋係有原因，主要係兩個。」婆婆思考咗一陣，嚴肅咁講。

「一嚟佢哋唔捨得就咁樣拋低咗你，驚會加重你嘅陰影，因為咁細個就要你去面對咁沉重嘅離別；二嚟就係想我哋遠離具有惡意嘅靈體。」





「有惡意嘅靈體？」我不解地問。

「個司機係專登尋死。」

「但係佢嘅方法係令到其他人都陪佢一齊，佢嘅怨氣係十分之大，所以當下係嗰個位置佢唔想我哋有任何捲入去嘅機會。」

我思考咗一陣。

「咁我⋯⋯我仲見唔見到佢哋？」





「你依家唔好見好啲，等你大個再見佢哋啦，嗲地媽咪都願意為咗等你，而留耐啲。」婆婆開始說服我。

「但我想佢哋可以解脫，我唔想佢哋咁樣掛心。」我唔滯⋯⋯我唔滯啊！！

「點解要大個啊？點解依家唔得啊？」

「因為當你大個咗，你可以承受同處理嘅嘢會比依家多，到時佢哋都會少咗呢啲憂慮。」婆婆安慰著我。

「同埋佢哋都想見到你大個咗亭亭玉立嘅樣。」





本身收咗聲我，繼續喊得勁。我記得嗰一日我係喊到攰，然後係喊到瞓著，我喊幾耐，婆婆就陪足我幾耐。

我無力嘅位係，即使我幾唔願意都好，我都無辦法搵到嗲地媽咪佢哋，如果佢哋真係唔願意，一唔係就要好似婆婆咁，透過入異地先見佢哋。

但係嗰陣嘅我，未有咁嘅覺悟同心理準備。

我好想即刻就好似婆婆咁入去搵佢哋，但我唔識，我驚。同埋婆婆一定會阻止我。

一諗到呢啲又繼續爆喊，不停咁重複，直至攰為止。