《我個老友從未來穿越返嚟，話我會愛上一個Kam女》: 040

【回到現在】

聽完叮噹個故事之後，家家真係有本難念的經，我哋已經知道對方難堪嘅地方，都渴望係生活入面搵到一丁點溫暖。

叮噹經歷過婆婆入異地嘅事之後，就睇得到啲靈體。

「所以經歷完前兩日你屋企嘅事之後，我又諗起我嗲地媽咪。」叮噹坐係床頭，抱住自己膝頭，我見佢都喊到尾聲。

「會再見到佢哋嘅。」我安慰叮噹。





「但你要早啲好返！」

叮噹笑咗，講：「知啦，我今日好返好多，我聽日會返返學。」

然後我再諗諗下佢嘅經歷，又經歷過屋企人離去，同時間返學又要俾人話Kam，神神化化咁，無論係親情定友情，都唔順遂。

因為咁，所以我就更加留意佢，至少⋯⋯我想見佢嘅開心樣。

我忽然一諗，興致沖沖咁問佢：「你驚唔驚玩鬼屋啊？」





「下？」叮噹好驚訝咁望住我。

「我好好奇如果你去玩鬼屋，會唔會驚或者睇到啲奇怪嘢？」近排臨近萬聖節，海馬公園好多宣傳。

「你好癲喎，你經歷完仲唔驚啊？」叮噹嫌棄個樣幾搞笑。

「驚啊，但你係度我就唔驚。」我淡淡定。

「你唔驚我咪去囉！」叮噹拋我，我估佢賭我唔夠膽。





「咁去㗎啦喎？陣間買飛！」我無俾佢轉彎嘅餘地。

「下？嚟真㗎？」叮噹嚇到係床度彈起，爬過嚟捉住我手。

「我似講笑咩？」我望住佢吃驚個樣，其實都幾可愛。

「但係我⋯⋯我未去過海馬公園喎⋯⋯」叮噹擔憂咁問。

「下⋯⋯你未⋯⋯？」我腦入面正想講呢句，但我即刻收返，我驚咁樣好似歧視緊佢，好似個個都要去過先叫做正常。

「無去過咪無去過囉！我帶你去玩咪仲好？」我都覺得自己幾癲，不停咁挑戰自己極限。

「真咩？」

「真啊！！」





一時衝動之下，即刻上網買咗兩張海馬公園哈佬喂嘅門飛，完全唔俾叮噹思考同拒絕嘅餘地。