《我個老友從未來穿越返嚟，話我會愛上一個Kam女》: 041

我今次自私約，無打算約唐師兄。好似對佢有啲衰，但呢個諗法好快就拋諸腦後，佢會支持我咁做嘅，哈哈哈！

叮噹嘅語氣好似好驚訝，但佢笑住咁樣講，又唔覺佢好抗拒，反倒係⋯⋯期待？

「唔叫埋唐師兄啊？」我估唔到叮噹會咁樣問。

「佢由細到大都驚鬼。」我求其作咗一個藉口，想耍走呢個電燈膽。

「哦，係啊？」





「姐係你依家約我去玩鬼屋啊？」此刻嘅我已經分唔清叮噹佢係Kam啊，定還是係純情？

叮噹臉上嘅淚痕仲係度，但係已經見到佢笑。

「咁你去唔去啊？」我問多佢一次。

「去去去，你約到，點都去。」叮噹泛起一絲甜笑。

叮噹唔再諗起啲唔開心嘅嘢就好。





「咁你扮唔扮鬼扮馬？」我問道。

「咩扮鬼扮馬？」

「姐係可以扮一啲角色或者鬼怪嘅嘢入去園區度，好多人都會一齊扮。」我拎埋ig出嚟解釋，俾叮噹睇下啲KOL係入去扮咩同影咩相。

「嘩...好得意喎！」叮噹有啲興奮。

「咁你想扮咩啊？」佢問我。





「我未諗到啊，你有無好鍾意好鍾意嘅動漫或者卡通啊？」

叮噹沉思咗一陣，最後靈機一觸，講咗一個我諗都無諗過，亦都唔知點答佢嘅回覆⋯⋯

「我諗到啦！我想你扮海斗！」佢依家就好似個細路女，好興奮咁係坐度彈嚟彈去，唔知做乜鳩？

「下？」

「你扮海斗，我就扮唱K小魚仙！我細個好鍾意睇㗎～」

「呀姐，你咩年代啊？我哋嗰陣有睇開唱K小魚仙㗎咩？？？？」我一頭霧水。

「我細個係婆婆啲DVD機度睇，我哋屋企無錢，加上婆婆年紀大，唔會識睇咩YouTube、Netfilx，佢都係睇開DVD電影同翡翠台。」

我真係有啲服咗佢⋯⋯我以為佢會扮鬼滅之刃啊，Marvel啊之類嘅人物，真係點估到佢⋯⋯