《我個老友從未來穿越返嚟，話我會愛上一個Kam女》: 042

我提出邀請，佢提出要求，好合理。

我專登唔揀太近萬聖節嘅時候入園，唔想太多人，只想點到即止，玩下園區，感受下鬼屋同埋氣氛就好。

距離當日仲有段日子，我唔知叮噹點諗啦，但我好撚期待！

一嚟我係第一次咁樣同女仔去主題樂團，二嚟我好期待叮噹入園開心同興奮嘅樣，三嚟我開始有啲FF帶叮噹入到去嘅互動。

FF佢玩機動遊戲前好驚嘅樣，玩完又覺得好興奮；FF佢睇海洋動物好開心嘅樣；FF佢玩鬼屋嚇到傻，捉實我嘅樣。





嘩⋯⋯淨係FF下都足夠我係張床度碌嚟碌去，瞓教都係興奮咁瞓著。

「你呢排做乜嘢？你啱啱病好，依家病到傻咗？」呀媽食飯嘅時候問我。

「咩啊？」我收起笑容。

「你個樣含曬春咁樣喎。」呀媽好似察覺到一啲端倪咁，「做咩啊？拍拖啊？」

「挑！邊有啊？你傻咗⋯⋯咩，我點⋯⋯會？」





「呯！」我關上房門，我最後幾啖飯都唔食，直接返入房。

乜真係咁明顯咩？唐師兄見到都算，佢呢幾日已經係咁chok我，但依家連呀媽都察覺到？

要避身邊嘅人嘅耳目都唔係咁容易，我實在係輸經驗⋯⋯無好好咁收埋自己嘅表情，但忍住又好辛苦。

同一時間，我同叮噹討論緊買邊套，點樣打扮，傾到如火如荼。

最後我哋係淘寶揀咗套，然後自己手工整咗啲道理，但係我哋唔會著住入去，因為又熱，又想玩其他機動遊戲，唔想著住去玩，所以玩到差唔多夜晚再換裝。





期待嘅日子終於到，我前一日瞓得幾個鐘，至於原因係咩，唔洗我多講啦？

我哋想食個早餐先入去，所以我一早就係叮噹個鋪頭等佢。

佢鋪頭未開，所以我只好係出面等。

我可以講今日係我打扮得最靚仔嘅時候了，盛裝準備！甚至係前幾日已經係度諗，我要著咩，同埋我要點搭配，全部細節一個不漏。

當我自己抽離返嘅時候，我驚覺自己好似沉沉地⋯⋯自己越嚟越在意。