《我個老友從未來穿越返嚟，話我會愛上一個Kam女》: 043

但我今次無再否認，我直面自己依家嘅心情，原來直面自己心情嗰一下，係幾享受。

同埋我都係抱住順其自然落去嘅心態，會點樣發展落去呢？

「咔——咔嚓——」鋪頭一聲巨響嚇親沉思緊嘅我。

我即刻企返好，準備返自己。

點知開門嘅係婆婆⋯⋯





佢睇我唔到，只係自己係度開門、開鋪。

無幾耐就見到叮噹落嚟，佢著住條飄逸嘅白色連身裙，腳步踉蹌咁行出嚟。

見到婆婆之後，又唔想驚動婆婆咁，躡手躡腳咁。

我見到佢個人之後，驚覺佢有打扮之後個look係咁唔同，雖然有啲小學雞扮大人嘅感覺，格格不入咁，但係勝在青春無敵。

同佢平時神神化化，古古怪怪嘅look完全唔同。





「做咩呆咗係度啊？快啲行啦，陣間俾婆婆知你就走唔到！」叮噹輕聲講。

「哦，好啊。」

聽到之後就同叮噹快步離開，我只記得我哋兩個臉上掛住嘅笑容。

同埋身上突然傳嚟一句說話，嚇到我哋兩個跑得更加快⋯⋯

「記得唔好玩咁夜啊！」婆婆係鋪頭大嗌，嚇到我心都離一離。





我哋係一間茶記度坐低咗，坐係叮噹對面，我先睇得清楚。

原來佢髮型都有特別整過，佢整咗兩條辮仔，然後戴咗個髮箍，更有青春少女嘅氣息。

好似都有化咗妝？但我唔識睇，總之感覺就係比平時靚啦！

「你唔好再望住我啦！揀野食啦！」叮噹怕醜咁講，然後佢拎起個餐牌擋住自己塊臉，物理性咁隔住咗我。

我望得咁明顯啊？頂，我都覺得有啲樣衰同失禮。

「咁你比平時唔同啊嘛，咁係要望真啲有咩唔同㗎啦。」我直言。

「好啊，咁我有咩唔同啊？」叮噹探個頭出嚟，用熾熱嘅眼光望住我。