《我個老友從未來穿越返嚟，話我會愛上一個Kam女》: 044

「可能係無咁Kam？」我打趣咁講道。

本來仲笑笑口嘅叮噹即刻收起笑容，嬲嬲地咁用個餐牌打我。

「淨係得咁多咋咩？」佢眼神凌厲，帶點威脅嘅意味。

我思考咗一陣，唔再玩佢。

「邊度係得呢啲啊？只係我未睇得慣你唔著校服個look姐，哈哈！」





「依家平比時返學靚太多！依家你幾青春？」

此時此刻嘅開心，可以暫時俾我哋忘記之前唔開心嘅經歷，可以係生活中搵到一點甜真係好唔容易，所以都額外珍惜。

我都好鍾意依家同叮噹小打小鬧，睇下佢一時嬲得可愛嘅樣，一時又怕醜咁，就更加令我有衝動咁整蠱佢。

「超！我平時唔青春咩？你試下再亂講嘢啊，陣間罰你自己玩海盜船！」

我內心回應，我唔怕㗎！但我唔會講出口啦，只好順勢扮到好驚咁。





快快趣食完個早餐，就出發入園。

去到海馬公園門口，叮噹已經「嘩」、「嘩」、「嘩」。

「咁大㗎？」佢o晒嘴，但係掛住滿滿嘅笑容。

跟住叮噹就開心到跳下跳下咁行入去，而我係隔離諗，一早無咗嗲地媽咪嘅佢，婆婆行動亦都唔方便，好多香港小朋友都去過嘅地方，對佢嚟講，唔一定可以擁有。

而我之所有嚟過，都係細細個有一個生日，我左扭右扭我媽咪，花咗一段時間，又咩考試要考得好先會帶我入嚟玩啊之類，先成功入到嚟。





最後叫埋唐師兄成家一齊入嚟玩，可以話係童年最開心嘅回憶之一。嗰次係第一次，之後亦都無再入過嚟。

「你想玩咩先啊？」入到去我問叮噹。

「你依家睇到咁大咋，座山後面仲有㗎，你見唔見到嗰個纜車啊？佢係直接去後面㗎，後面山先係最多機動遊戲嘅地方。」

「下？後面仲有？咁快啦快啦，去後面玩！！」叮噹好興奮咁拉住我隻手，衝去纜車個位。

佢好似之前嘅我，我第一次入嚟嘅時候，都係咁嘅反應，唔可以話似，因為係直頭一模一樣。

「你等等先！呢度仲有嘢可以睇嘅，唔洗咁心急住。」