我要返大埔: 1. 怪物在維港

一架同往日一樣，準時七時三十分開出，由中環駛向大埔嘅307巴士上面，一班各有不同職業，互不相識，不同背景，響命運嘅安排下，好似沙甸魚被困響罐頭咁，被巴士捆綁埋一齊嘅乘客，佢地正不約而同咁同望出窗外睜大雙眼，但同時一粒聲都講唔出。

所有人只係呆左咁望著個巨大嘅黑影向前移動，一個大小就咁睇都起碼係巴士嘅十倍甚至二十倍以上嘅龐然巨物，正響佢哋面前旁若無人咁走過。

只係比佢嘅餘光掃過嘅，已經令我成個人打冷震。我忽然覺得自己好渺小，好似電影2001太空漫遊裡面未進化嘅猿猴。

巴士駛入左入東隧之前嘅一個迴旋急彎，維港嘅風景快速咁響巴士上面嘅人嘅視覺中消失。
兩邊嘅風景由維港嘅海景不斷旋轉，好似進入左時空隧道，飛快咁轉變嘅景物由一個長長嘅海港，變成由石屎建成嘅石等，再最後進入左一個完全密閉嘅空間，307已經進入左東區海底隧道入面。

「恐龍？哥斯拉？怪物？」響我側邊傳黎一把似乎比我年輕嘅女性發出嘅聲音。





我呆左咁望住佢，唔好講我冇辦法回答佢嘅問題，我甚至由上車到呢一刻都無為意自己隔離原來坐左個女性，而更更甚至唔知呢個人類女性狀嘅物體係一個好靚嘅女仔。

另一種生物嘅本能令我無辦法好好作出任何對現階段有意義嘅思考。