我要返大埔: 2. 巴士上的人們 上

我從來唔知道，原來一群充滿恐懼嘅人嘅眼神係咁可怕，好似一個黑洞，將所有勇氣，智慧，冷靜都吸光。

「痴線咩，怪物，你睇片睇到傻左呀？」

當一樣完全唔合理嘅事出現響面前時，人總係偏向逃避現實，搵藉口，比個理由自己，去解釋個件唔合理嘅事。

「你會唔會係睇錯呀？」
「BB你好衰架，你咪再整估我啦？你再咁我嬲你架。」

車上面充滿著各種情緒同恐懼，而比起親身經驗帶黎嘅不安，冇親眼見到嘅人往往更恐懼。





「我唔知，唔好問我，你問下其他人囉！」
不安變成懷疑，懷疑變成憤怒。

見唔到嘅人開始懷疑其他人，將見到真相嘅人當成佢哋質問同發洩恐懼情緒嘅對象。

然後，佢地需要一個出口⋯⋯

「我知喇！係立體投影！你地有冇睇過蜘蛛俠，其中一幕個壞人就係用嗰啲咩航拍機，響個天度飛黎飛去，將一隻大怪物變出黎！」
「係呀！我都有睇過呢套電影！」





有個坐喺中排嘅眼鏡男突然企起身叫出黎，坐佢後兩排嘅office boy打扮嘅男仔隨即附和。

一個毫無根據嘅答案，但係足以令大家暫時平靜落嚟，就好似一個人快要沉落水底，無論你比一樣點樣嘅野佢，都會即刻死命咁捉緊唔放一樣。

人，就係咁軟弱嘅生物，我哋對咩真相呀公義呀嘅堅持，從來都係經唔起挑戰，如果呢一刻要我為左捍衛真相而企起身，冒住令半架車嘅人更不安嘅風險，我寧願選擇安靜收聲，靜靜地響自己腦裡面思考究竟發生咩事。

何況事件實在太過離奇，就當為左安撫自己都好，心理上我都寧願相信係自己睇錯，而唔想相信自己親眼見到嘅事實。

「跟本唔係咁⋯⋯」坐我側邊嘅女仔自己同自己講嘢。