橙皮、橙汁、橙籽: Ch.4-阿蚊

開舖之後，生意慢慢上軌道。眨吓眼就過咗大半年。朝早賣台飲同蛋糕，夜晚做燒烤……兩段時間夾埋，人流開始穩定。我同周仔每日輪流睇舖，忙到癲，但係好充實。

有一日，周仔話：「阿橙，我老婆個fd個女想嚟做兼職，你可唔可以帶吓佢？」

「幾多歲？」我問。

「十九。」周仔話。「讀完書冇耐，想出嚟學吓嘢。佢屋企喺街市開糧油店，好似話係獨生女，屋企唔等佢份糧開飯，佢純粹想吸收吓社會經驗。」

「好呀。」我話。「叫佢嚟見工啦。」





第二日，佢嚟咗。

佢叫阿蚊。

佢個子嬌小，皮膚白淨，紮住條馬尾，著住一件好簡單嘅T恤同牛仔褲。佢行入嚟嘅時候，有少少怕醜，對眼成日望住地下。

「你好，我叫阿蚊。」佢細細聲講。

「我叫阿橙，係呢度嘅副店長。」我話。「周仔話你想嚟做兼職？」





「係……我想學吓嘢。」佢望咗我一眼，好快又望咗第二度。

「你以前有冇做過嘢？」我問。

「冇……」佢搖咗搖頭。「我屋企開糧油店，我間中會幫手。但係正式打工，冇試過。」

「咁你點解想嚟做嘢？」我再問。

佢沉默咗一陣，然後話：「我想試吓靠自己。唔想成日都俾屋企人話我咩都唔識。」





我望住佢，忽然覺得，呢個女仔，有種好真摯嘅倔強。

「好。」我話。「你聽日開始返工啦。不過先講明，我份人做嘢好認真，你唔好用Hea住嘅心態嚟做。」

「我唔會Hea嘅！」佢即刻話，對眼好堅定。

就係咁，阿蚊成為咗我哋舖頭嘅兼職。