橙皮、橙汁、橙籽: Ch.5-師徒

阿蚊第一日返工，乜都唔識。

我教佢做嘢，由最簡單嘅開始。
例如抹枱、執碗、落單。
佢好努力咁學，但有時都會做錯嘢。

「你落錯單啦，呢張枱係要凍檸茶，唔係熱檸茶。」我話。

「對唔住！」佢即刻低頭，好緊張咁道歉。





「唔使成日道歉。」我話。「做錯嘢好正常啫，最緊要係記住，下次唔好再錯。」

佢點咗頭。

日子一日一日咁過，阿蚊慢慢開始上手。
佢記性好，學得快，而且佢有一個好大嘅優點——
佢好有禮貌，對客人都好有耐性。
有啲客好麻煩，成日投訴呢樣投訴嗰樣，但係阿蚊永遠都笑住咁應對。

「你唔嬲咩？」有一日我問佢。





「嬲咩呀？」佢反問。

「啲客咁麻煩，你仲笑住對佢。」

「哦……我細個成日聽我阿媽講，做嘢要有耐性，客人永遠係啱嘅。」佢話。「總之我覺得，笑住同人講嘢，總好過同人鬧交。」

我望住佢，忽然覺得，呢個十九歲嘅女仔，原來好成熟。

我開始教佢做一啲更加難嘅嘢。教佢點樣沖咖啡、點樣整簡單嘅甜品、點樣應對唔同嘅客人。佢學得好認真，每次我一示範完，佢就會自己喺度練習。





「你學嘢學得咁快，將來一定好叻。」有一日我讚佢。

佢塊面即刻紅咗：「多謝你，橙哥哥。」

「橙哥哥」呢個稱呼，係阿蚊自己改嘅。佢初初叫我「橙哥」，之後嗌嗌吓就變咗「橙哥哥」。
佢話「橙哥哥」好聽啲、搞笑啲喎。

我冇辦法，唯有由得佢叫。

就咁樣，又過咗大半年。