《落腳點》: 診所

坐喺黃Sir 車上面嘅副駕位置，望住車窗外嘅建築物，我知道我哋去緊中環方向。

我絕對唔係一個容易俾人導向嘅人。佢用合約條款迫我去睇醫生，而家諗返其實有少少嬲。唔止嬲佢用條款嚟壓我，更加嬲自己俾佢講幾句就跟咗佢上車。

頭先佢係Cafe打咗個電話，好輕易就已經安排好醫生。甚至我叫佢俾醫生嘅資料我，等我可以自己去睇醫生，佢都用「個期我幫你插，我唔同你去似乎唔係幾好」呢一個藉口嚟做推搪。

我究竟喺度做緊乜？點解呢個男人可以好簡單，用幾句說話就操控咗我？

開始有啲後悔自己唔去急症室，而係應承咗黃Sir 去佢相熟嘅診所度睇醫生。





「嘖。」諗到呢度，口中忍唔住發出一聲不滿。

黃Sir 轉頭望咗我一眼，再將視線放返喺路上。

「點呀？唔舒服？」

「冇。」

「幾時整親㗎？」





「唔知？」

「噚日？」

「係啩。其實你可唔可以專心揸車唔好講嘢？」我極之不耐煩地道。

「好⋯」佢笑咗一下。出乎意料之外，真係冇再講嘢。

車喺中環繁忙嘅街度左穿右插，終於駛進一幢商業大厦嘅停車場。泊好車，我就跟住佢搭電梯上去樓上嘅診所。





診所所在嘅樓層除咗呢間外科診所之外，仲有其他專科，甚至仲有心理學家診所。黃Sir熟練地穿過幾間診所之間嘅走廊，最後喺一間診所玻璃門前企定，拉開門俾我先入去。

「早晨，黃生。」櫃檯後嘅登記護士熟絡地打招呼。

「早晨，呢位係我頭先同Dr. Ng 提過嘅莫小姐。」

「莫小姐，麻煩你幫我填返啲資料做登記。」護士遞上一張病人資料登記表。

莫小姐⋯，已經好耐冇人咁樣稱呼我。
我接過表格，將資料逐項填上。中英文姓名、身份證號碼、出生日期、地址、聯絡電話、敏感史⋯。最後一項我遲疑咗一陣，決定留空。

我將表格連同簇新嘅身份證交返俾護士，護士小心地核對。

「莫小姐，緊急聯絡人你未填。」護士指住表格上嘅空格道。





「冇。」我搖搖頭。

可能我答得太快太肯定，護士從表格抬起頭，一臉愕然望定我，再解釋：「緊急聯絡人可以填家人或朋友。」

「我冇。」我再補充：「唔需要，唔該。」

「哦⋯。莫小姐，咁你坐陣等叫名。」護士表情生硬地道。

我點點頭，喺診所角落嘅梳化坐低。診所候診嘅人唔多，但似乎每一個人嘅視線都集中喺我身上，真係好想就咁走咗去。

黃Sir就坐喺我對面嘅梳化，好似若無其事咁隨手拎起茶几上嘅雜誌翻閲，但我知道其實頭先嗰一刻，佢同其他人一樣，都曾經瞄過我一眼。

我望住牆上嘅圖畫。圖畫裏面畫乜嘢唔重要，最重要係俾到一個目標我可以集中精神，唔需要理會其他人嘅眼光。

「莫小姐，可以入去喇。」護士嘅聲音再次響起。





我從梳化企起，預備行入診症室。呢個時候黃Sir 將手上嘅雜誌合埋，放返喺茶几。

「黃Sir，你要嘅係Report，我諗唔需要睇我嘅傷口。」我冷冷地道。

「你啱，我喺度等你。」佢聳一聳肩，重新拎起雜誌。

我跟隨護士行入走廊盡頭嘅房間。醫生已經坐喺枱後面等緊我。

「莫小姐？坐吖。」佢指一指放喺枱邊嗰張櫈。「Michael 話你手臂有傷？」

我一邊坐低一邊簡短答應：「係。」

醫生望住我包紮得亂七八糟嘅前臂，輕輕皺眉：「點整親㗎？」





「救火，灼傷。」我用沙啞嘅聲音回答。除咗必要資訊之外，我唔想講太多。

呢個時候醫生仔細端詳我。

「莫小姐，麻煩你除一除眼鏡。」

知道無得揀，我唯有乖乖將眼鏡除低，俾醫生檢查。

「嗯，你一定好近距離去撲火。面部皮膚灼傷，不過好彩只係好輕微，唔會留有疤痕，對眼被煙燻過，有啲紅腫⋯」

「對眼唔關事⋯。」我細聲反駁。

醫生望定我，點咗點頭，似乎明白我所講嘅嘢。

「你有冇喉嚨腫痛？你把聲好沙，又有咳，似乎吸入咗少少濃煙。」





「有，但其實已經好過噚晚。」我盡力地解釋。

醫生暫時冇再說話，專心幫我檢查。

「我明你諗乜，你嚟得我呢度睇，就係唔想入院，初步檢查暫時都冇乜嘢，應該只係吸入好少量嘅濃煙，但我嘅意見係你應該去醫院檢查⋯」醫生一邊收起聽診器一邊道 。

「我哋嚟呢度，只係想攞一個證明，證明我而家嘅情況可以工作。」

「明白⋯，咁我睇埋你手臂嘅傷口先再講。」

護士帶我到醫生診症間附設嘅治療室，安排我坐好，再將手臂放到換藥枱上。我望住自己前臂上，一邊係普通嘅繃帶，另一邊係用舊T恤剪落嚟嘅布條包紮，越嚟越後悔聽咗黃Sir嘅説話嚟咗呢度。

坐喺對面嘅醫生戴好手套，開始拆開右邊嘅繃帶。原本我以為傷口已經唔痛，但而家先發現，只係今日發生太多事情，下意識將痛感壓低。醫生將一層層嘅繃帶解開，刺痛嘅感覺就越嚟越強烈。因為我用繃帶緊緊包住傷口，令到原本皮膚上嘅水泡破裂，傷口上嘅紗布黏住傷口，醫生要用生理鹽水沾濕紗布先可以慢慢拆除。

當醫生將生理鹽水倒在覆蓋傷口嘅紗布上，痛感令到我不期然縮一縮手。

「會痛，忍一忍。」護士輕輕按住我肩膀道。

「嗯。」我邊點頭邊應道。

噚晚我只憑住微弱嘅月光去觀察、清潔傷口。而家喺治療室嘅冷白燈光下，先至發現傷口面積雖然唔算好大，但比我想像中嚴重。

水泡穿破後，乾涸嘅淡黃色滲液連同焦黃捲曲嘅死皮斑駁地黏喺傷口，粉紅色嘅嫩肉失去表皮嘅保護，裸露於空氣中。而因為醫生掀開紗布，令到傷口不停滲出血絲，不規則嘅傷口周圍嘅皮膚亦開始微微紅腫。

醫生用帶住無菌手套嘅手指輕按傷口周圍，仔細地檢查。佢嘅動作雖然已經好輕柔，但仍然令我痛入心扉，甚至冷汗直流。

「係咪好痛？」醫生溫柔地問道。

「唔痛。」為咗可以得到證明我適合工作嘅報告，我唯有強作鎮定，硬住頭皮道。

「妹妹，我知道你諗乜嘢。你知唔知其實燒傷傷口唔痛仲嚴重過痛㗎？唔使死頂喎，痛就出聲啦。」醫生從傷口抬頭望住我，眼中帶笑，停頓一下再問道：「我再問多你一次，痛唔痛？」

「⋯痛。」我一邊細聲講，一邊感到自己耳仔開始發熱。

「好，而家幫你清創，真係會痛㗎。」醫生點點頭道。

醫生拎起鉸剪同鉗，小心地將傷口周圍嘅死皮剪走，再用生理鹽水沖洗傷口，甚至用紗布輕輕抹拭傷口，抹走黏喺傷口上，乾涸咗嘅黃色滲液。

雖然醫生嘅動作已經好溫柔，但我已經痛得全身被汗濕透，甚至微微震顫。

清創完畢，醫生喺傷口搽上厚厚嘅藥膏，鋪上油紗布及厚棉墊，再用繃帶將手臂一圈一圈包好。

「呢一邊搞掂，到另外一隻手。不過我真係想知道你究竟發生乜嘢事，你連正經嘅敷料都冇，淨係用舊嘅布包住隻手，你知唔知傷口好容易感染？」醫生一邊斜睨住我左手一邊道。

「唔係淨係舊布。」一陣沉默後，我好簡短咁回答醫生嘅提問。

懶得解釋，亦唔想解釋。

醫生拎住鉸剪嘅手停頓一下，抬頭望咗我一眼，再低頭繼續佢嘅工作。

佢小心翼翼咁用鉸剪將包喺左手嘅布條剪開，終於露出底層保護傷口嘅物料。

「呢個係乜嘢嚟⋯」醫生眉頭緊皺。

醫生用處理右手一樣嘅手法，將覆蓋傷口「敷料」浸濕，再慢慢剝除。

終於要俾人見到我最唔願意示人嘅醜態，我感到面頰耳根灼熱。

醫生放低手上嘅工具，輕輕嘆一口氣。我知道我嘅傷口唔會令佢有任何震撼。身為外科醫生，更嚴重嘅傷口佢都見過。

「我唔知你整傷嗰陣有幾狼狽，亦都唔知點解你唔即時睇醫生，不過⋯」佢指一指「敷料」，繼續道：「你識得用女性衛生用品去覆蓋傷口，你都算醒。雖然唔理想，因為呢樣嘢唔係無菌，傷口仍然有機會感染。但勝在叫做好過冇⋯」

「不過，我諗如果唔係Michael帶你嚟，你都唔會睇醫生？係咪？」

「嗯⋯」我冇否認，只係含糊地認咗一聲。

醫生輕輕搖搖頭，開始幫我清創。

呢隻手嘅傷口一樣都係咁痛，但我已經冇心思去理會。

比起傷口嘅痛楚，我更加在意嘅係醫生同護士憐惜嘅眼神。我垂低頭，唔敢再同佢哋有眼神接觸。

唔想再見到嗰種可憐我嘅眼神，唔想被發現我雙眼已盡濕。

治療室裏面靜落嚟咗，只剩低醫生幫我清創時，無菌嘅鑷子同鉸剪嘅金屬碰撞聲音；包紮時敷料及繃帶磨擦嘅窸窣聲，以及我濃重嘅呼吸聲。

「好啦，已經幫你處理好傷口。」醫生邊除手套一邊道。

「唔該。」我重新戴好太陽眼鏡，隨住醫生從治療室返回診症室。

醫生坐返喺自己嘅書枱，喺病歷上飛快地填寫記錄。

「我會開止痛藥同埋抗生素藥膏俾你，暫時開住五日病假⋯」

「醫生，我唔需要病假⋯，我想你幫我寫一封信證明我可以工作。」我打斷醫生嘅説話。

「莫小姐，你會唔會有少少誤會？你真係覺得你而家嘅傷勢適合工作？」醫生從病歷抬起頭，望定我道。

「但係，黃Sir 話要有證明先可以分派工作⋯」我抗議道。

醫生放低筆，雙手十指交扣放到枱上正式道：「我明白你嘅concern，Michael亦都講得冇錯。」佢指一指我嘅雙臂。「但你而家呢個情況，頭幾日要每日返嚟換藥，仲要觀察傷口有冇感染。你之前吸入過濃煙，亦都唔可以唔理。」

「咁即係⋯」我嘆口氣，無力地挨喺椅背。

「咁即係你要放病假。等你真係好返，我先可以出證明俾你。」

我已經攰到唔想再講任何嘢，只可以無奈地點點頭，離開診症室。

黃 Sir 見到我行出嚟，放低手上嘅雜誌，瞄咗我手臂上嘅繃帶一眼，簡短地問一句：「點呀？」

我懶得理睬佢，逕自行到角落嘅梳化坐低，等候叫名攞藥⋯，同埋預約聽日嘅覆診。

我低頭望住自己纏滿繃帶嘅雙臂，醫生嘅説話喺我腦裏面迴響：「停工」、「休息」，對其他人嚟講，係最好嘅安排。

「嘿。」我苦笑，對我嚟講，呢一個安排只係可以被不堪記憶侵襲嘅裂縫。

「莫小姐⋯」隨住護士叫喚，我行到取藥處，護士已經將藥物排到枱上，將藥物逐一講解。

「藥膏一日四次搽面；抗生素七日療程要食晒；止痛藥有需要就食，四個鐘一次，飽肚，食完會眼瞓⋯」

護士講解完已經將藥放入膠袋，隨即再拎出兩份文件。

「呢度係五日嘅病假紙，同埋一封轉介信。傷口記得唔好濕水，如果敷料濕咗或者繃帶鬆咗，唔好自己搞，可以即刻返嚟，又或者拎住轉介信去到近嘅醫院處理。如果冇問題嘅聽日同樣時候再返嚟洗傷口。」

「嗯。」我將文件連同藥袋拎起，放入背包。

「診金連藥費二千三百蚊。」護士再將收據放到枱上。

「之後洗傷口嘅診金要而家俾埋？」我疑惑地問道。

「莫小姐，二千三百蚊係今日嘅診金，之後每次一千蚊。」

唔使拎出銀包，都知道我根本冇足夠嘅錢去俾醫藥費。果然，銀包裏面除咗一大疊收據之外，就只得五、六張紅色嘅紙幣。呢幾百蚊甚至其實係我呢個星期嘅生活費。

「唔⋯。」我拎住銀包原地僵立，感到面紅耳赤，甚至腋下手心開始出汗。

呢個時候，企喺隔籬嘅黃Sir喺自己銀包抽出幾張紙幣交俾護士。

「我講過診金會自己俾返⋯」我細聲抗議道，但説話顯得蒼白無力。

「我冇話幫你俾，你要還㗎⋯」黃Sir 聳一聳肩道。

「好返晒，開工有錢就還。」佢將收據遞俾我，轉身就走。

「放心，我唔會欠你嘅。」我接過收據小心收好，隨着佢嘅腳步離開診所。