咁其實我入唔到紅磚大,又對畫畫/運動唔係好上心,唔通我就真係乜都無就咁走出西九龍校園然後9月就入都大?非也。

因為自己本身喺西九龍校園同高級文憑嗰度都累積咗一定嘅知名度。再加上自2017年累積各種唔同類型社交平台經驗(由巴士討論區到雙登,Meta旗下嘅Facebook, IG 同埋Threads, 仲有Discord, Dcard, Telegram等等)總共十年經驗左右。

然後喺今年3月左右就發現Threads 係一個相當之神奇嘅平台。 唔同Facebook 或者 IG,雖然先前已經經營咗兩年,但係我發現呢度唔單止本地後生嘅會鍾意,更加有唔同華語區嘅受眾喺曬呢度。而且就算打啲傻嘢都可以變成流量密碼,對於我呢種急需擴展自己影響力嘅人有好大誘因。

仔細研究仲會發現同我年紀相若嘅青年網民會張我平時啲圖send出去。然後會配上一啲自己嘅文字當post咁出。「你睇吓嗰位Tony,我今日又見到佢,好有份量。」「又喺條街到撞到Tony 啦,不過佢唔睬我,唔開心囉。」「有時見到Tony無啦啦坐喺個樓梯口到喊,會戥佢擔心。」

睇完之後我就覺得Threads對我嘅將來名氣會一飛沖天!所以由嗰時開始,我投放喺Threads上面嘅時間越嚟越多。開始將自己所有嘅個人特點槓桿化。例子就有---





不停出自己想入紅磚大想到要發誓!

為自己嘅減肥目標而發誓!

為自己畫畫嘅目標而發誓!

同時又會講自己希望成為女性,係個百合狂熱者,又會就自己嘅精神問題出好多個post。咁中間就當然有人會話我叫我唔好乜嘢都出一輪。但係我無理到。

反而喺暑假期間每日都喺到日夜顛倒咁生活。由晏晝起身去到凌晨四五點,食飯,去廁所,沖涼,出街,部機叉緊電時候。唔係出緊post就係喺覆緊人哋啲post。呢個密度相當成功地將我嘅瀏覽量由最初幾萬去到最高峰時期嘅540萬左右,而粉絲數量都由3月大約500個升都9月大約4000個左右,足足有8倍差距。





我係Threads嘅投入程度係遠遠超過自己喺肯德基返part-time 嘅投入程度。所以有時都會諗就係如果我一日喺Threads到出post每1000瀏覽量就有0.5蚊美元收入嘅話,我點解仲要喺肯德基到返part-time 呢?當然,呢啲只喺我嘅幻想,如果肯德基個小編睇到呢都嘅話千奇唔好炒我!!!我始終都係好需要呢份收入去幫付自己嘅支出。

去到8月中旬,我喺個入學介紹到大叫(已經唔記得咗喺咩原因)呢個行為被當初啱啱見到嘅新面孔擺咗係Threads上面。而我亦都成功入咗去都大嘅discord網站,打出呢句:「大家好,我叫Tony,我嘅目標係喺都大CGPA攞超過3.70然後入返紅磚大讀返Year 1,同時,我想喺都大玩Ocamp兼搞漫畫學會。」
已有 0 人追稿