都會錡思妙想ING: 12. 夢遇所思 (2)
啊!我竟然喺呢個夢世界裏面約到喺現實生活裏面對我冷淡既偶像出街?既然係咁我就走去開始搵衫
呢件粉紅色連身裙唔知點樣呢,應該可以突顯到我個人好可愛掛,不過咁樣會唔會被姖嫌我著得普通㗎?
如果係呢件黑色吊帶連身裙呢,應該可以將我既身材同埋曲線突顯出嚟,但係咁樣著嘅話可能會被街邊啲變態佬睇曬㗎喎,仲要有Lace添?雖然條裙未至於去到好短。
一喺就著得普通啲,著件短袖粉色T恤加條牛仔褲咁著又會點樣呢,咁樣著應該唔會比啲變態佬望著掛?但係萬一比Kido睇到我腋下嘅汗印咪好尷尬?同埋咁樣著下面會好焗好唔舒服。
咁樣要揀邊件先至會啱我著呢?
我睇衫睇完一輪又一輪,始終都係唔知要點樣著先襯到今日嘅感覺。唉!好心啦,點解喺夢裏面性轉嘅過程無整走拖延症呢個壞習慣嘅?
然後我又再望一望個鐘,大鑊!個鐘已經去到朝早九點,但係人哋明明約咗Kido十點鐘喺樂園到等,再喺咁拖落去我根本就唔會有出發既可能!
於是我決定喺黑色吊帶連身裙出面加件薄薄哋灰色T恤,然後喺條裙裏面加多條安全褲。咁樣嘅話喺夜晚嗰時比到Kido驚喜!
去到九點半,我食完個包之後走咗。跟住因為呢日到幾熱吓。所以搭車嗰陣周不時聞住人哋啲汗臭味,頭油味,有啲人懶到連件衫都唔會洗就有陣嗡味。至少喺夢裏面,身份喺Sonia嘅我。真係好想架車裝返部空氣清新機。
去到樂園出面打開部手機望下時間,弊!十點半!足足遲咗半個鐘。究竟Kido會唔會因為咁而嬲咗我。定係姖見我咁耐都未嚟到所以唔等我走去入園?
我個腦又開始喺度諗如果當初唔係揀衫揀咁耐,係咁就可以准時到達現場?Kido之後會唔會因為呢件事當我係個唔守信用而唔彩我?我同姖之間嘅感情會唔會咁就完結?
正當我諗得越嚟越深入嗰時,有個著住橙色雞翼袖同埋灰白色裙褲嘅女仔出現喺我面前。而姖正正係Kido本人,不過睇姖嘅樣似係完全未瞓醒。
「早晨啊~Sonia, (打喊露)」
我:「Kido? 你無事啊嗎?你睇落去好攰咁嘅樣,其實你可以今朝打個電話取消。」
Kido: 「我又點好意思話取消呢?雖然尋晚操舞步同埋練歌搞到個人好攰,但係一諗到可以同你出街始終都係好期待,人哋尋晚係興奮到瞓唔著啊!」
我:「你個衰妹都咁嘅狀態都仲可以講啲咁甜嘅說話嘅,不愧係地下偶像。」
Kido:「不過我而家真係好眼瞓,想去樂園外圍嘅長櫈到瞓一陣可以嗎?」
我:「當然,人要精神先至有好心情去玩。」
咁啱我哋坐嗰時有把好巨型嘅綠色太陽傘喺出面遮紫外線,同時,喺Kido瞓緊覺嗰陣,我順手攞把手提風扇開著吹吓上半身,等個人無咁熱,畢竟我仲未準備好俾姖聞我啲汗嗰陣個反應,所以我再順便攞紙巾偷偷地抹走身上出嗰啲汗。