都會錡思妙想ING: 13. 夢遇所思 (3)
Kido瞓咗大約兩個鐘之後,個人終於精神返。當然,對我嘅體感就好似去咗兩個鐘頭汗蒸幕咁樣。雖然已經用把風扇吹住自己個身,但係我始終都係覺得好熱。
姖醒咗之後,見到我啲髮絲被汗水整到凌亂,同埋見到我件衫背面啲汗印,之後再打開部電話。見到個時間就碌到對眼大一大。姖望著我個樣好驚奇咁講
「Sonia, 點解我瞓咗咁耐你都唔叫醒我嘅?仲咩要傻豬搞到自己咁熱?」
我:「見你瞓到咁稔我真係好唔忍心叫醒你,因為你瞓著個樣實在太QQ,好想就咁樣望多你一陣,結果我就咁望咗兩個鐘。」
跟著Kido扮嬲咁款打我,雖然呢度係我嘅夢世界,但係如果喺現實世界裏面作為生理男性嘅我可以咁樣被個偶像「調情」。我真係會覺得好爽。
Kido:「時間都唔早,不如而家我地喺樂園裏面搵個有冷氣嘅餐廳食飯。」
之後我哋就走咗去一間叫Wonder Buffet 到食晏,望著個餐牌嗰時我覺得個餐坐底都百五蚊一套。覺得好貴,不過見Kido話今餐姖請,當係我陪姖嗰兩個鐘頭嘅回報。
Kido個餐就係一碟西班牙海鮮炒飯配個細漢堡包,而我個餐就有一碟肉醬意粉,裏面仲配埋烤雞脾同埋粟米。我哋仲叫咗兩杯上面有心型拉花嘅咖啡。
呢個餐廳仲有個好特別嘅規定,每檯人可以免費攞一杯雪糕,如果要攞多嘅就每三十蚊一杯,食完去counter比錢。我哋就咁揀咗杯最似戀愛顏色嘅士多啤梨味,之後就返去餐檯到食飯。
咁食飯之前,我哋就先將嗰兩個杯連埋一齊影張相先,之後就問姖關於最近嘅安排,姖話最近其實啲舞就練到七七八八,跟著歌嗰度都同隊員相合。不過姖就擔心表現嘅時候會臨時甩底。因為現場嘅環境同埋練習室嘅環境唔同,希望之後表演時個擴音器唔好壞,咁先至可以比每一位觀眾都聽到歌聲。
我:「聽完你咁講之後覺得你個表現唔會有問題,我到時一定會去現場支持你。」
Kido: 「多謝,咁Sonia你最近又有咩搞作啊?」
我:「自己嘅話,應該會繼續經營IG, 會拍吓Reels同埋出吓post。跟住睇吓有冇商家搵我搞搞Marketing,有嘅我到時會接job。」
Kido: 「都幾好啊,Sonia,如果有機會嘅話,到時我哋一齊接job啊。」
我哋除咗傾自己嘅未來,仲會傾埋各自喺社交媒體會發生嘅八卦,仲會講埋自己同其他男仔相處經歷等等等等,同時,我哋用同一個匙羹互餵對手食雪糕,你一啖我一啖。
呢種隔住匙羹就可以感受對方嘴唇嘅感覺好sweet。當然,喺呢個空間裏面,我哋當然有就著呢一幕去影相,之後Kido就去咗比錢。