都會錡思妙想ING: 16. Week 6(2) OVERLOADED
呢種頹態不停延續,對我嚟講而家日日都係抱住呢種負能量去生活,個心慢慢凋零。
跟住自己食完飯之後發現又係成個體態被人影咗上Threads到。見到自己同一年前比,好似又肥咗一個圈。對我嚟講,明明就係要瘦落嚟先至會有身型綫條有腹肌,咁我先至係個有魅力既人。結果講咗減肥咁多年越講越肥!
見到自己嘅狀態咁差,就有個諗頭係如果無辦法喺First hon畢業,而要係Third hon到畢業。即係話我係都大學院裏面係一個無競爭力既學生,畢業之後無辦法透過自己嘅成績入返去紅磚大或者搵份筍工嚟做。
既然個情況發展到咁,點解我仲要留係呢個世界上面?做人究竟有咩意思?
然後我再去校網到睇,發現自己已經有份功課過咗Deadline, 如果再唔做就當係零分處理。
我係Threads到連續出咗好幾個post講自己。
「Tony, 你發完脾氣未?已經有份功課要遲交,仲要咁唔專心,你俾啲時間落去做好份野得唔得?你需要孤獨㗎!」
「我求下你珍惜生命,勇敢地讀到First hon畢業,堅強地生存落去啦!好唔好?」
「越係口講話想要First Hon, 行動上見唔到自己做咗啲乜去實踐,求下自己珍惜生命啦!」
我係圖書館部電腦到,求其喺校網揾咗幾篇資料再打幾段文字就交咗。
交完之後打開Discord發現自己被Vtuber米亞嘅私人群組封咗,理由係自己乜都攞出嚟講一餐,影響到米亞同其他會員既交流。搞到佢哋投訴。
見到之後真係冇心情再做其他野,我就去ITU嗰度借尿袋,然後開始瘋狂打機,打到部機無電之後就用學校電腦玩。呢一玩又係好幾個鍾頭,結果今日餘下時間幾乎打機之外就無再做其他野。
玩完電腦就打開Threads,又碌咗唔知幾多分鐘之後剩係覺得我記咗一堆對自己毫無用處既資訊。見到有用戶叫我剷除APP,但係我真係好需要他人既關注,戒唔到。
然後我入咗IG, 發現管理帳號嗰個位有管理帳號呢個選項,就係可以剷除Threads個帳,然後係冷靜期完結之前可以做恢復呢個選項。
既然係咁,不如試吓剷除個Acc一日,睇吓有咩感覺?順便俾自己冷靜吓。